कनिका खबर
भदौ २५, रामेछाप
कोरोना महामारी रोकथाम तथा नियन्त्रणका लागि नेपाल सरकारद्वारा जारी मार्गदर्शन २०७६ कार्यान्वय गर्ने विषयमा स्थानीय तहमा अन्यौलता देखिएको छ । कोरोना रोकथाम तथा नियन्त्रणका लागि सरकारले जारी गरेको कोरोना महामारी कोभिड–१९ रोकथाम तथा नियन्त्रणका लागि समुदायमा स्वयंसेवक परिचालन सम्बन्धी मार्गदर्शन २०७६ कार्यान्वयनमा रामेछापका स्थानीय तहमा अन्यौलता देखिएको हो । सरकारले मार्गदर्शन जारी गरेको करिब ४ महिना वितिसक्दा रामेछापका अधिकांश स्थानीय तहमा मार्गदर्शन कार्यान्वयनमा अन्यौलता देखिएको छ । सरकारले गत चैतमा स्थानीय तह, स्वास्थ्यकर्मी, सुरक्षा निकाय, महिला स्वास्थ्य स्वयंसेविका, रेडक्रस, गैरसरकारी संस्थाका प्रतिनिधि र सामुदायिक स्वयंसेवकहरुको सहभागितामा स्थानीय तहका हरेक वडाहरुमा फिल्ड समुदाय स्तरको कोरोना रोकथाम (कोभिड–१९ प्रीभेन्सन सिपिजी) गठन गरी परिचालन गरेर संक्रमण रोकथाम र नियन्त्रण सम्बन्धमा जनचेतना अभिवृद्धि गर्ने उद्देश्यले मार्गदर्शन २०७६ जारी गरेको थियो ।
६ वटा गाउँपालिका र २ वटा नगरपालिका रहेको रामेछाप जिल्लामा कोरोना रोकथाम स्वयंसेवक समूह गठन गर्ने क्रममा एकरुपता देखिएको छैन । कतिपय स्थानीय तहले मार्गदर्शन बमोजिम स्वयंसेवक समूह गठन गरेका छन् भने कतिपयले आफ्नै तरिकाले गठन गरेका छन् । लिखुतामाकोशी गाउँपालिकाले समूह गठन गरे पनि हालसम्म परिचालन गर्नु नपरेको बताएको छ । खाँडादेवी गाउँपालिकाले मार्गदर्शन बमोजिम गठन गरेर परिचालन गरेको र सो वापतको खर्च गाउँपालिकाले नै व्यवस्था गरेको स्वास्थ्य शाखा संयोजक ओमप्रकाश श्रेष्ठले जानकारी दिनुभयो । ७ वटा वडा रहेको उमाकुण्ड गाउँपालिकाले मार्गदर्शन बमोजिम कोरोना रोकथाम स्वयंसेवक समूह गठन गरेर परिचालन गरेको स्वास्थ्य शाखाका संयोजक दिपेन्द्र पैकडाले जानकारी दिनुभयो । तर, परिचालन गरिएका स्वयंसेवकहरुलाई खाजा, खाना र प्रोत्साहन वापतको रकम दिने विषयमा हालसम्म पनि बजेटको व्यवस्था नहुँदा भुक्तानी दिन नसकिएको उहाँले बताउनुभयो । रामेछाप नगरपालिका, मन्थली नगरपालिका, दोरम्बा गाउँपालिका, सुनापति गाउँपालिका मध्ये कतिपयले समूह गठन गरि परिचालन गरेका छन् भने कतिपयले परिचालन नै गरेका छैनन् । केही पालिकाले खाजा, खाना र प्रोत्साहनको समेत व्यवस्था नगरी परिचालन गरेका छन् ।
