कनिका खबर
भदौं ३१, काठमाडौं
नेपालमा पछिल्लो २४ घण्टामा थप ११ जनाको कोरोना भाइरसको सङ्क्रमणका कारण मृत्यु भएको स्वास्थ्य तथा जनसंख्या मन्त्रालयले पुष्टि गरेको छ । योसँगै नेपालमा कोरोनाले ज्यान गुमाउनेको संख्या ३ सय ७१ पुगेको छ । यस्तै पछिल्लो २४ घन्टामा कोरोना सङ्क्रमणबाट मुक्त भइ घर फर्किनेको संख्या १ हजार ६२ रहेको स्वास्थ्य तथा जनसंख्या मन्त्रालयले जनाएको छ । यो सँगै हालसम्म कोरोना सङ्क्रमणबाट निको हुनेको संख्या ४० हजार ६३८ पुगेको मन्त्रालयका प्रवक्ता डा. जागेश्वर गौतमले जानकारी दिनुभयो । मन्त्रालयका अनुसार हालसम्म पीसीआर विधिबाट ८ लाख ६१ हजार ७८० परीक्षणहरु गरिएका छन् । त्यसैगरी २४ घन्टामा जम्मा १० हजार ३७५ पीसीआर परीक्षण भएका छन् । २४ घण्टामा थप १ हजार ४ सय ५९ जनामा कोरोना भाइरस (कोभिड–१९) को सङ्क्रमण पुष्टि भएको छ । योसँगै आजसम्म नेपालमा जम्मा कोरोना सङ्क्रमितको संख्या ५६ हजार ७ सय ८८ पुगेको छ । अहिले सार्वजनिक यातायात चलेको र भिडभाड पनि बढेकाले स्वास्थ्य सर्तकता अपनाउन पनि डा. गौतमले सबैलाइ आग्रह गर्नुभयो । यसैबीच, सरकारले कोरोना भाइरसको लक्षण नदेखिएका सङ्क्रमितको परीक्षण नगर्ने भएको छ । स्वास्थ्य आपतकालिन तथा विपत व्यवस्थापन ईकाइको आइतवार बसेको वैठकले लक्षण देखिएका व्यक्तिहरुको मात्र परीक्षण गर्ने निर्णय गरेको हो ।
मन्त्रालयले क्वारेन्टिनमा र्दुइ साता अनिवार्य बस्नुपर्ने तर उनीहरुमा लक्षण नदेखिए परीक्षण नगर्ने र फ्रन्ट लाईनमा खटेका चिकित्सक र स्वास्थ्यकर्मीहरूको पनि लक्षण नभए परीक्षण नगर्ने जनाएको छ ।
