कनिका खबर
असोज ५, जुम्ला
जुम्लामा आठ दिनदेखि सत्याग्रहमा रहेका डा.गोविन्द केसीको शरीरमा रोग प्रतिरोधात्मक क्षमता कम हुँदा सङ्क्रमणको खतरा भएको चिकित्सकहरूले बताएका छन् । कर्णाली स्वास्थ्य विज्ञान प्रतिष्ठानले आज दिउँसो एक विज्ञप्ति जारी गदै डा.केसीको रगतमा चिनीको मात्रा अति कम रहेको र प्रमुख अङ्गमा जटिल समस्या देखिन थालेको बताएको छ । डा. केसीले कुनै स्वास्थ्य परीक्षण गराउन नमानेको विज्ञप्तिमा उल्लेख छ । हाल डा केसीलाई प्रतिष्ठानको आईसीयूमा राखिएको छ । डा.केसीले स्वास्थ्य जाँच तथा उपचार पूर्ण रुपमा अस्वीकार गरिरहेको हुँदा सहज हुने स्थानमा स्थानान्तरण गर्न चिकित्सकहरुले सुझाएका छन् । गत भदौ २९ गते कर्णाली स्वास्थ्य विज्ञान प्रतिष्ठानमा एमबीबीएसलगायत शैक्षिक कार्यक्रम सञ्चालन गरिनुपर्ने र स्नातकोत्तर तहको अनुमति तत्काल प्रदान गर्नुपर्नेलगायत ६ बुँदे माग राखेर जुम्लाको चन्दननाथ ६, रानीचौरमा रहेको वाविरा मन्दिरमा डा केसीले १९औँ सत्याग्रह सुरु गर्नुभएको थियो ।
मा प्रकाशित
