जनता आधारभुत विद्यालय पहिरोको उच्च जोखिममा

कनिका खबर
असोज ७, दाङ ।
दाङको देउखुरीमा एक सामुदायिक विद्यालय पहिरोको उच्च जोखिममा रहेको छ । जिल्लाको राप्ती गाउँपालिका वडा नम्बर ५ को पहाडी गाउँ करङ्गेकोटमा रहेको जनता आधारभुत विद्यालय पहिरोको उच्च जोखिममा रहेको छ । सिसहनियाँ बजार देखि करिव ७÷८ किलोमिटरको दुरीमा रहेको सो विद्यालय नियमित वर्षातका कारण विद्यालयको दुई कोठे भवन सहित शौचालय पहिरोको उच्च जोखिममा पर्नु साथै स्टोर रुम पहिरोले पुरिने देखिन्छ भने तारबारमा समेत क्षति पुगेको विद्यालयका शिक्षक तुलबहादुर कंवर मगरले जानकारी दिएका छन् ।
तत्काल पहिरो रोकथाम नगरिए कक्षा ७ र ८ को २ कोठे भवन र शौचालय पहिरोले लैजाने खतरा बढेको शिक्षक मगरले बताएका छन् । कक्षा ८ सम्म सञ्चालित सो विद्यालयमा करिव २ सय ७० विद्यार्थी रहेका छन् भने एक कार्यालय सहयोगी सहित ११ जना शिक्षकहरु रहेका छन् ।