कनिका खबर
कार्तिक ३, काठमाडौं
देशभर कोरोना भाइरसको सक्रिय सङ्क्रमितको संख्या ४० हजार नाघेको छ । स्वास्थ्य तथा जनसंख्या मन्त्रालयका अनुसार आज सम्म देशभर सक्रिय सङ्क्रमितको संख्या ४० हजार ७ सय ७८ पुगेको छ । मन्त्रालयका प्रवक्ता डा. जागेश्वर गौतमले सक्रिय सङ्क्रमित मध्ये १३ हजार ८५१ जना संस्थागत आइसोलेशन र २६ हजार ९२७ होम आइसोलेशनमा रहेको जानकारी दिनुभयो । यस्तै गत २४ घण्टामा ३ हजार ७९० जनामा कोरोना सङ्क्रमण पुष्टि भएको छ । थपिएका सङ्क्रमित मध्ये २ हजार ३ सय ८८ जना काठमाडौं उपत्यकाका छन्, जसमध्ये काठमाडौंका २००८ जना, ललितपुरका २८१ र भक्तपुरका ९९ जना छन् । यससँगै कुल सङ्क्रमितको संख्या १ लाख ३६ हजार ३६ पुगेको छ । यस्तै पछिल्लो २४ घण्टामा २ हजार ३ सय ३५ जना सङ्क्रमणमुक्त भएसँगै निको हुनेको कुल संख्या ९४ हजार ५०१ पुगेको प्रवक्ता डा. गौतमले बताउनुभयो । यस्तै हालसम्म देशभर कोरोनाबाट मृत्यु हुनेको संख्या ७५७ पुगेको छ । पछिल्लो २४ घण्टामा मात्र थप १८ जनाको मृत्यु भएको मन्त्रालयले जनाएको छ ।
मा प्रकाशित