कनिका खबर
कार्तिक ८, कालिकोट
कालिकोटको शुभकालिका गाउँपालिकाका जनप्रतिनिधीले आफ्नै सेवासुविधाबाट सामाजिक सुरक्षा भत्ता वितरण गरेका छन् । आफूहरुले पाउने सेवा सुबिधा कटाएर जनप्रतिनिधिले नागरिकलाइ सामाजिक सुरक्षा भत्ता वितरण गरेका हुन् । केन्द्रबाट सामाजिक सुरक्षा भत्ता बापतको रकम गएपछि भने उनीहरुले खर्च गरेको रकम लिने छन् । दशैको समयमा जनप्रतिनिधिले देखाएको यो उदारलाइ स्थानीयले प्रशंसा गरेका छन् । संघबाट सामाजिक सुरक्षा भत्ता बापतको रकम नगएपनि स्थानीय सरकारका जनप्रतिनिधिले आफ्नै खर्चमा भत्ता वितरण गरेपछि पालिका भित्रका नागरिक खुसी भएका छन् । ७६ वर्षका धननाथ योगी दुइ किस्ताको रकम पाएपछि हर्षित हुनुभयो । नेपाल सरकार गृह मन्त्रालय राष्ट्रिय परिचय पत्र तथा पन्जीकरण विभागबाट बार्षिक ५ करोड ७५ लाख रुपैंया शुभकालिका गाउँपालिकामा आउँछ । तर अहिले केन्द्रबाट आउने रकम आउन ढिला हुँदा पनि पालिकाले कार्तिक सम्मको सामाजिक सुरक्षा भत्ता दिएको छ । यसले नागरिकलाइ चाडबाड मनाउन सजिलो भएको स्थानीय उज्जले अधिकारीले बताउनुभयो । शुभकालिका गाउँपालिकामा सामाजिक सुरक्षा भत्ता पाउनेहरु ४ हजार ३ सय ६० जना छन् । हाल पालिकाले सामाजिक सुरक्षा भत्ता बापत ३ करोड ७८ लाख रुपैया वितरण गरेको छ । जस मध्येबाट १ करोड ५० लाख रुपैया जनप्रतिनिधीको सेवा सुविधा बाट दिइएको छ भने बाँकी रकम पालिकाले विकासी बजेटबाट दिएको गाउँपालिका अध्यक्ष खडानन्द चौलागाँईले बताउनुभयो । पालिका भित्रका नागरिकहरुको दशै तिहार राम्रो होस भन्ने उदेश्यले यसरी सामाजिक सुरक्षा भत्ता वितरण गरेको गाउँपालिकाले जनाएको छ ।
मा प्रकाशित