नागरिक सचेत नभएसम्म कोरोना महामारी नियन्त्रण हुँदैनः स्वास्थ्य मन्त्रालय

कनिका खबर
कार्तिक १२, काठमाडौं
नागरिक सचेत नभएसम्म नेपालमा फैलिएको कोरोना महामारी नियन्त्रणमा आउन नसक्ने सरकारले जनाएको छ । दसैँ लगायतका अन्य चाडपर्वमा यथास्थानमा मनाउन सरकारले निरन्तर आग्रह गरे पनि कतिपय मानिस सहर बजारबाट घर गएर दसैँ मनाएको प्रति स्वास्थ्य तथा जनसंख्या मन्त्रालयले चिन्ता व्यक्त गर्दै यस्तो बताएको हो । धेरैले मन्त्रालयको आग्रहलाई मानेर यथास्थानमा दसैँ मनाए पनि केही मानिस भने टाढा–टाढाबाट कोरोना बोकेर चाडपर्व मनाउन घर गएको मन्त्रालयका प्रवक्ता डाक्टर जागेश्वर गौतमले सीआइएनसँग बताउनुभयो । जसका कारण कोरोना महामारीको जोखिम झन् बढेको उहाँको भनाइ छ ।
यसैबीच पर्वतको जलजला गाउँपालिकामा कोरोना सङ्क्रमितको सङ्ख्या बढ्न थालेपछि हिजोदेखि समुदायस्तरमै कोरोना परीक्षण गर्न थालिएको छ । सङ्क्रमितको सम्पर्कमा आएकाहरूमा धमाधम कोरोना पुष्टि हुन थालेपछि गाउँपालिकाले ‘एक घर–एक पिसिआर जाँच’ अभियान सुरू गरेको गाउँपालिका अध्यक्ष यामबहादुर मल्लले जानकारी दिनुभयो ।