कनिका खबर
कार्तिक १७, रौतहट
रौतहटका दुई वटा स्थानिय तहले अझै यो वर्षको नगर परिषद गर्न सकेका छैनन् । २ गाउँपालिका र १६ नगरपालिका गरि १८ स्थानीय तह रहेको रौतहटमा दुई वटा नगरपालिकाले अझै नगर परिषद गर्न सकेका छैनन् । स्थानीय सरकार सञ्चालन ऐनमा आर्थिक वर्षको असार १० गते सबै स्थानीय तहले परिषद गरी १५ गते बजेट पारित गर्नुपर्ने प्रावधान रहेको छ । नगर प्रमुख र उपप्रमुखबीचको विवादका कारण राजदेवी र कटहरिया नगरपालिकाको परिषद हुन नसकेको हो । नगर परिषद समय मै हुन नसक्दा विकास निर्माणका योजनाहरू पनि प्रभावित भएका छन् । आगामी आर्थिक वर्षका विकास निर्माणका योजना र चालू आर्थिक वर्षमा गरिने कामको योजना तर्जुमा हुन सकेको छैन । कटहरिया नगरपालिकाका नगर प्रमुख सियाराम कुशवाहा र उप प्रमुख नुरजहा खातुनबीचको विवादले परिषद् हुन सकेको छैन भने राजदेवी नगरपालिका नगर प्रमुख धीरेन्द्र सिंह र उपप्रमुख अन्सु सिंहबीचको विवाद उत्कर्षमा पुगेपछि परिषद अन्यौलमा छ ।


