कनिका खबर
कार्तिक २०, नवलपुर
मध्यविन्दु जिल्ला अस्पताल नवलपुरबाट पिसिआर परिक्षणको लागि पुस पहिलो सातासम्म कुर्नुपर्ने भएको छ । कात्तिक १ गते जिल्ला अस्पताललाई संघीय सरकारले सहयोग गरेको पिसिआर मेसिन संघीय सांसद तिलक महतले जिल्ला अस्पतालाई हस्तान्तरण गर्नु भएको थियो । तर, आवश्यक पूर्वधार र जनशक्तिको अभावमा सञ्चालनमा आउन ढिलाई भएको हो । भौतिक संरचना निर्माण, अन्य औजार र जनशक्ति व्यवस्थापनको लागि समय लाग्ने भएकाले जिल्ला अस्पतालबाट कोभिड–१९ परिक्षणको लागि पुस पहिलो साता कुर्नुपर्ने अस्पतालका सुचना अधिकृत छबिलाल सुबेदीले जानकारी दिनुभयो । पिसिआर परिक्षण गर्न ल्याब निर्माणको लागि भौतिक संरचना निर्माणको टेण्डर पक्रिया अगाडी बढाइएको सुवेदीले बताउनुभयो । करिव २० लाख रुपैयामा भौतिक संरचना निर्माणको काम सक्नेगरी कार्य बढाइएको उहाँको भनाइ छ । गण्डकी प्रदेश सामाजिक विकास मन्त्रालयले पुर्बाधार निर्माणका लागि १० लाख, जनशक्ति व्यवस्थापनका लागि १४ लाख, फर्निचरका लागि ५ लाख, कम्प्युटरका लागि ५ लाख रुपैया सहित अन्य आवश्यक शिर्षकमा बजेट बिनियोजन गरेको छ । ल्याब सञ्चालनको लागि आवश्यक पिसिआर मेसिन संघीय सरकारले सहयोग गरेको हो भने आवश्यक अन्य व्यवस्थापन गण्डकी प्रदेश सरकारले गरेको हो । ल्याब सञ्चालनको लागि आवश्यक जनशक्ति व्यवस्थापनको लागि सुचना प्रकाशन गर्ने तयारीमा अस्पताल रहेको सुवेदीले जानकारी दिनुभयो । उहाँका अनुसार तत्कालका लागि ४ जना प्रयोगशाला बिज्ञ र २ जना कार्यालय सहयोगीका लागि दरबन्दी माग गरिएको छ । अन्य ३ जना आन्तरिकबाट व्यबस्थापन गरिनेछ । पिसिआर परिक्षण शुरुभएपछि दैनिक तिन सय सम्म परिक्षण गर्न सकिने छ । हाल नवलपुरमा संकलित स्वाब परीक्षणका लागि चितवन, हेटौडा, पोखरा लगायतका क्षेत्रमा पठाउने गरिएको जनाइएको छ ।
मा प्रकाशित
