कनिका खबर
कार्तिक २६, दाङ ।
दाङ जिल्लामा महिलालाई बोक्सीको आरोप लगाउने ३ जना पक्राउ परेका छन् । बोक्सी भन्दै गाली गलौज गरेको आरोपमा घोराही र तुलसीपुरबाट २ महिला र १ पुरुष गरी ३ जना पक्राउ परेका हुन् । पक्राउ पर्नेमा घोराही उपमहानगरपालिका वडा नम्बर १६ की बर्ष २८ की दिपा बाठाँ मगर र बर्ष ४५ की नौमती महरा रहेको प्रहरीले जनाएको छ । उनीहरुले कार्तिक २१ गते धामी झाक्रीको भेषमा काम्दै सोही ठाउँकी दुई महिलाको घरमा गई बोक्सी भन्दै गाली गलौज गरेका थिए ।
जिल्ला प्रहरी कार्यालय दाङका प्रवक्ता तथा सूचना अधिकृत सुमित खड्का अनुसार पीडित महिलाले बोक्सी भन्दै गाली गलौज गरी इज्जत मान प्रतिष्ठामा आँच पुर्याएको भनी जाहेरी दिएका छन् । पक्राउ परेका दुई महिला माथि थप अनुसन्धान भइरहेको उनले बताए ।
यस्तै कार्तिक १५ गते तुलसीपुर उपमहानगरपालिका वडा नम्बर ५ बस्ने ३० वर्षीया एक महिलालाई बोक्सी भन्दै गाली गलौज गरेको आरोमा सोही वडा स्थित संगितनगर टोल बस्ने देब बहादुर परियार पक्राउ परेका छन् । पीडित महिलाले दिएको जाहेरीमा देब बहादुरले हातपात समेत गरेको उल्लेख गरिएको प्रवक्ता खड्काले बताए । उनी माथि पनि आवश्यक अनुसन्धान कार्य भईरहेको खड्को भनाई छ।
