कनिका खबर
मंसिर ४, काठमाडौं
नेपालमा लकडाउन शुरु भएयता कात्तिकमा सर्वाधिक संख्यामा पर्यटक भित्रिएका छन् । अध्यागमन विभागका अनुसार कात्तिक महिनामा मात्र २ हजार ९ जना विदेशी नागरिक नेपाल आएका हुन् । नेपालमा हवाई मार्गबाट भित्रिएका जुनसुकै प्रयोजनमा भित्रिएका विदेशी नागरिक समेत पर्यटक गनिन्छन् । एक महिनामा एक हजार तीन सय ७० जना पुरुष र ६ सय ३९ जना महिला पर्यटक नेपाल आएका छन् । सरकारले १७ अक्टोवरबाट पर्यटकलाई घुमफिरमा आउन खुला गरेको थियो । त्यसअगाडी नै पर्वतारोहण र पदयात्रामा आउने पर्यटकलाई संस्थागत रुपमा सिफारिस लिई नेपाल आउने ढोका खुलेको थियो । यसले क्रमशः पर्यटक आगमन बढ्दै गएको छ । एक महिनामा अमेरिकाबाट मात्र चार सय ५५ र बेलायतबाट ती सय २६ जना नेपाल आएका छन् । चीनबाट एक सय ६१, भारतबाट एक सय २५, टर्कीबाट ८२ र रुसबाट ८१ जना पर्यटक नेपाल आएको तथ्याङ्क छ । एक महिनाको अवधिमा नेपालबाट विदेश फर्कने विदेशी नागरिकको सङ्ख्या भने एक हजार ८ सय ७२ जना रहेको छ ।
मा प्रकाशित
