एजेन्सी
अमेरिकी राष्ट्रपति डोनाल्ड ट्रम्पले कोरोना भाइरस नियन्त्रणको लागि सुझाव दिएको औषधीको कारण अमेरिकामा कोरोना महामारी बढेको एउटा अध्ययनले पुष्टि गरेको छ । ट्रम्पले मलेरियाविरुद्ध प्रयोग गरिने हाइड्रोक्सि क्लोरोक्वीन औषधीले कोरोना निको हुने भन्दै सर्वसाधारणलाई उपयोग गर्न आव्हान गरेका थिए । गार्जियनका अनुसार अनुसन्धानकर्ताहरुले विभिन्न ६७१ अस्पतालका ९६ हजार बिरामीमा अध्ययन गरेका थिए ।
त्यसक्रममा हाइड्रोक्सिक्लोरोक्वीन औषधिले कोराना नियन्त्रणमा कुनै भूमिका नखेल्ने बरु यसको गलत तरिकाले प्रयोग गर्ने क्रम बढिरहेकोले महामारी थप बढिरहेको पुष्टि भएको थियो । अध्ययनको क्रममा बिरामीलाई विभिन्न समूह बनाई गरिएको थियो । त्यसक्रममा उक्त औषधी नदिइएका बिरामीको मृत्युदर औषधी दिइएका बिरामीको भन्दा कम देखिएको हो । कुनै एक औषधी दिइएका हरेक ६ जनामध्ये १ जनाको ज्यान गएको छ । त्यस्तै क्लोरोक्वीन र एन्टीबायोटिक औषधी लिने हरेक ५ जनामध्ये १ जनाको ज्यान गएको छ । त्यस्तै हाइड्रोक्सि क्लारोक्वीन र दुवै एन्टीबायोटिक प्रयोग गर्ने हरेक चारमध्ये १ जनाको मृत्यु भएको छ । यसैगरी कुनै औषधी प्रयोग नगरेका हरेक ११ मध्ये १ जनाको ज्यान गएको उक्त अध्ययनले देखाएको छ । फ्रान्सका एक चिकित्सकले आफूले बिरामीलाई हाइड्रोक्सि क्लारोक्वीन औषधी प्रयोग गरिरहेको र त्यसबाट बिरामीलाई ठीक भएको दावि गरे लगत्तै ट्रम्पले पनि त्यो औषधि प्रयोग गर्न आव्हान गरेका थिए । त्यस लगत्तै संसारभर यसको प्रयोग तीव्र भएको थियो । तर, त्यसले कोरोना नियन्त्रणमा कुनै भूमिका नखेलेको बरु गलत प्रयोगले कोरोना फैलिएको दावि अनुसन्धानकर्ताहरुले गरेका छन् ।
द गार्जियनका अनुसार अहिलेसम्म हाइड्रोक्सि क्लारोक्वीन कुनै पनि परीक्षणबिना नै विश्वका धेरै देशमा प्रयोग गरिएको छ । पछिल्लो पटक आएको यो अनुसन्धान प्रतिवेदन पछि वैज्ञानिकहरूले अब कोरोनाका बिरामीलाई अनुसन्धानका लागि बाहेक यो औषधी दिन नहुने बताउन थालेका छन् ।