कनिका डेस्क
जेठ १२, दाङ ।
चितवनको भरतपुर अस्पतालमा एक जना बिरामीको उपचारका क्रममा मृत्यु भएको छ । बुटवलबाट रेफर भएर आएका ४८ वर्षका पुरुषको कोरोना संक्रमितको उपचारका लागि तयार पारिएको अस्पतालको आईसीयूमा मृत्यु भएको अस्पतालका मेडिकल सुपरिन्टेन्डेन्ट डा श्रीराम तिवारीले जानकारी दिनुभयो ।
गयराति साढे १२ बजेतिर गम्भिर अवस्थामा अस्पताल ल्याइएका उनको आज बिहान ३ बजे उपचारको क्रममा मृत्यु भएको अस्पतालले जनाएको छ । उनमा छाती दुख्ने, वान्ता हुने, स्वास फेर्न गाह्रो हुने लगायतको समस्या देखिएको थियो ।
नवलपरासीको रामग्राम–५ का उनलाई बुटवल सिटी अस्पताल र लुम्बिनी प्रादेशिक अस्पतालमा लगिए पनि त्यहाँबाट भरतपुर रेफर गरिएको थियो । उनको कोरोना परीक्षणको लागि बुटबलमा नै स्वाब संकलन भएको र रिपोर्ट आउन बाँकी रहेको अस्पतालले जनाएको छ ।