कनिका डेस्क
जेठ १९, दाङ ।
बाँकेको राप्ती सोनारी गाउँपालिका–२ ठुरिया जंगलमा पूर्वपश्चिम राजमार्गअन्तर्गत गाडी दुर्घटना हुँदा मृत्यु हुनेको संख्या १२ पुगेको छ । २० जना घाइते भएका छन् ।
नेपालगञ्जबाट सल्यानतर्फ जाँदै गरेको फोर्स गाडी भारतको रूपैडिया नाका हुँदै नेपाल प्रवेश गरेकाहरुलाई लिएर जादै गर्दा गएराति करिब १२ बजेतिर दुर्घटनामा परेको हो । ११ जनाको घटनास्थलमै र एक जनाको भेरी अञ्चल अस्पताल नेपालगन्जमा उपचारको क्रममा मृत्यु भएको जिल्ला प्रहरी कार्यालय बाँकेका इन्सपेक्टर हृदयश सापकोटाले जानकारी दिए ।
३३ जना सवारी वोकी सल्यान तर्फ गइरहेको फोर्स भ्यान अनियन्त्रित भई रोकिराखेको ट्रकमा ठोक्किएको ट्राफिक प्रहरीले बताएको छ ।
दुर्घटनाका घाइतेहरुको उपचार नेपालगन्जस्थित भेरी अस्पतालमा भइरहेको छ । साथै मृतकहरुको शव पनि पोस्टमार्टमका लागि अस्पताल लगिएको ट्राफिक प्रहरी प्रमुख बमले जानकारी दिए ।
दुर्घटनाको विस्तृत विवरण आउन बाँकी छ ।
