कनिका संवाददाता
जेठ २५, दाङ ।
दाङको बेलझुण्डीमा रहेको कोरोना बिशेष अस्पतालबाट १० जना कोभिड १९ बाट संक्रमितको डिस्चार्ज भएका छन् । डिस्चार्ज हुनेमा बाँकेका ५ जना, कपिलबस्तुका दुईजना, दाङका दुईजना र बर्दियाका एक जना रहेको अस्पतालका मेडिकल सुपरिटेण्डेन्ट डा. सर्वेश शर्माले बताए ।
डा. शर्माका अनुसार उनीहरुलाई राखेको २२÷२३ दिनसम्म पनि कुनै लक्षण नदेखिएपछि सरकारले गरेको परिपत्रका आधारमा डिस्चार्ज गरिएको हो । बाँकेका २, दाङका एक, कपिलबस्तुका एक र बर्दियाका एक जनाको तेस्रो रिपोर्ट भने नेगेटिभ आएर डिस्चार्ज गरिएको हो । भने अन्य ५ जनाको लक्ष्ण नभएपछि डिस्चार्ज गरिएको हो ।
स्वास्थ्य मन्त्रालयले कोभिड–१९ केशको आइसोलेसन व्यबस्थापन सम्बन्धि निर्देशिकामा कुनै पनि लक्षण नदेखिएपछि संक्रमितलाई १४ दिनपछि डिस्चार्ज गर्ने उल्लेख छ । अहिले बेलझुण्डीमा ४५ जना संक्रमितको उपचार भइरहेको छ ।
