कनिका संवाददाता
जेठ ३०, रौतहट
कोरोना भाइरस सङक्रमणको बेला जिम्मेवारीपूर्ण कार्यसम्पादन नगरेको भन्दै रौतहटको मौलापुर नगरपालिकाले मेडिकल अधिकृतलाई बर्खास्त गरेको छ ।
मौलापुर नगरपालिकाको पतौरामा रहेको प्राथमिक स्वास्थ्य केन्द्रका मेडिकल अधिकृत डा. हरिशंकर प्रसादलाई सेवाबाट बर्खास्त गरेको हो । कोरोना सङक्रमण बढी रहेका बेला नगरपालिकाले निर्माण गरेको क्वारेन्टानमा बसेकालाई चेकजाँच गर्न कुनै चासो नदिएको र नगरपालिकामा स्वास्थ्यको अवस्था कमजोर बन्दै जाँदा पनि काम गर्न नसकेका कारण उहाँलाई सेवाबाट हटाइएको नगरपालिकाका प्रमुख प्रशासकीय अधिकृत सिकेन्द्र साहले बताउनुभयो ।
प्रशासकीय अधिकृत साहका अनुसार उहाँको करार अवधि असार मसान्तमा सकिँदै थियो । तीन महिनाअघि मात्रै उहाँलाई मेडिकल अधिकृतको रुपमा नगरपालिकाले करारमा नियुक्ति गरेको उहाँले बताउनुभयो । रौतहटमा पाँच सय ३१ जनामा कोरोना सङक्रमण पुष्टि भइसकेको छ भने एक सय दुइ जना निको भएर घर फर्किएका छन् ।
