कनिका संवाददाता
जेठ ३१, काठमाडौँ ।
सरकारका पछिल्ला गतिविधिका बारेमा असन्तुष्ट रहेको भन्दै नागरिकले दिनहुँजसो विरोध प्रदर्शन गर्दै आएका छन् । नागरिकको विरोधलाई मथ्थर पार्न सुरक्षाकर्मीले पानीको फोहोरा, अश्रु ग्यास प्रयोग गर्नुका साथै कतिपय स्थानमा बलसमेत प्रयोग गर्दै आएको छ ।
आज पनि काठमाडौँमा कोरोना रोकथाम तथा नियन्त्रणका लागि भएको खर्च विवरण पारदर्शी बनाउन माग गर्दै प्रदर्शन भएको छ । आजको विरोधमा सहभागीहरुले हातमा गुलाबको फूल लिएर सरकारलाई आफ्नो दायित्व नबिर्सिन स्मरण गराएका छन् । पानीका फोहोरा र अश्रु ग्यास प्रयोग गर्नेहरुका लागि पनि प्रेमको प्रतीकका रुपमा रहेको गुलावको फूलले सद्भाव र आत्मीयता नबिर्सन सुझाएको छ । पछिल्लो समयमा देशका विभिन्न स्थानमा विरोधका लागि विरोध नभएर पारदर्शीता र सद्भावका लागि विरोध गरिदै आइएको छ ।
माइतीघर क्षेत्रको सडक किनारमा भेला भएका नागरिकहरुले लिम्पियाधुरासहितको नयाँ नक्साका लागि सरकारलाई धन्यवाद दिँदै कोरोना नियन्त्रणको क्षेत्रमा भएको भनिएको १० अर्बको हिसाब मागेका छन् ।
