सहिद स्मारक ‘ए’ डिभिजन लिग फुटबलको बाह्रौं चरणको खेलहरू आजबाट सुरु हुँदैछन् । त्रिपुरेश्वरस्थित दशरथ रङ्गशालामा हुने पहिलो खेलमा फ्रेन्ड्स क्लब र च्यासल युथ क्लबबीच प्रतिस्पर्धा हुनेछ ।
फ्रेन्ड्स र च्यासलबीचको खेल दिउँसो १ बजे सुरु हुनेछ ।फ्रेन्ड्स र च्यासलका लागि यस खेल महत्त्वपूर्ण रहेको छ । दुबै टोलीलाई रेलिगेसनबाट जोगिन यस खेल जित्नैपर्ने दबाब छ । फ्रेन्ड्स ११ खेलमा ७ अङ्क जोडेर १२ औं स्थानमा रहेको छ । च्यासललाई हराएर फ्रेन्ड्स रेलिगेसनको दबाबबाट माथि निस्कन चाहन्छ ।च्यासल ६ अङ्क जोडेर पुछारमा रहेको छ ।
यस खेलमा हार ब्यहोरेमा च्यासल रेलिगेसनमा पर्नेछ । त्यसैले च्यासल फ्रेन्ड्सलाई हराएर रेलिगेसनको डर कम गर्न चाहन्छ ।यस्तै दोस्रो खेलमा च्याम्पियन बनिसकेको मछिन्द्र फुटबल क्लब र थ्री स्टार क्लबबीच प्रतिस्पर्धा हुनेछ । मछिन्द्र र थ्री स्टारबीचको खेल दशरथ रङ्गशालामै ४ः४५ मा सुरु हुनेछ ।मछिन्द्र ११ खेलमा २९ अङ्क जोडेर शीर्ष स्थानमा रहेको छ ।
थ्री स्टारलाई हराएर मछिन्द्र अपराजित यात्रा कायम राख्न चाहन्छ ।थ्री स्टार १८ अङ्क जोडेर चौंथो स्थानमा रहेको छ । थ्री स्टार मछिन्द्रलाई हराएर शीर्ष दुईमा उक्लन चाहन्छ ।
