चैत्र २८, काठमाडौँ ।
निर्वाचनमा ६ करोड खर्च भएको भन्ने अभिव्यक्तिलाइ लिएर निर्वाचन आयोगले काँग्रेस नेता शशांक कोइरालालाई स्पष्टीकरण सोधेको छ ।
कोइरालाले आफूले निर्वाचनमा भाग लिदा ६ करोड खर्च भएको भन्नेबारेमा दिएको अभिव्यक्ति सञ्चार माध्यममा आएको थियो । यसबारेमा ७ दिनभित्र यर्थाथ जानकारी गराउन आयोगले नेता कोइरालालाइ आग्रह गरेको छ ।
नवलपरासी बर्दघाट निर्वाचन क्षेत्र नम्बर १ बाट २०७४ सालको चुनाव लड्दा कोइरालाले पेश गरेको चुनावी खर्च विवरणमा २१ लाख ७५ हजार रुपैयाँ पेश गरेको देखिएको आयोगले जनाएको छ ।
तर विभिन्न सञ्चारमाध्यममा ६ करोड खर्च भएको बताएकाले यसबारेमा जानकारी दिन आयोगले भनेको हो ।
यसैबीच, निर्वाचन आचारसंहिता उल्लङ्घन गरेको आरोपमा निर्वाचन आयोगले नेकपा एसलाइ स्पष्टीकरण सोधेको छ । अस्ति शनिबार भृकुटिमण्डपमा आयोजित कार्यक्रममा नेकपा एसले आचारसंहिता उल्लङघन गरेको उजुरी परेपछि आयोगले ३ दिनभित्र जवाफ दिन आग्रह गर्दै पत्र काटेको प्रवक्ता शालिग्राम शर्मा पौडेलले जानकारी दिए । आयोगले प्रमाणसहित चित्त बुझ्दो जवाफ पेस गर्न आग्रह गरेको छ ।
