कनिका डेस्क
असार ६, दाङ
नेपाली पुरुषसँग विवाह गर्ने विदेशी महिलालाई सात बर्षपछि मात्र अंगीकृत नागरिकता दिने नेपाल कम्युनिष्ट पार्टी (नेकपा) को निर्णयको प्रदेश दुइमा विरोध भएको छ । आज बसेको प्रदेशसभा बैठकमा जनता समाजवादीका सांसदले नेकपाको यो निर्णय महिला र मधेश बिरोधी भएको बताएका छन् ।
साथै नेकपाले नेपाल र भारतको वैवाहिक र सांस्कृतिक सम्बन्धलाई उजाड्न खोजेको उनीहरूको आरोप छ । जनता समाजवादी पार्टीका सांसद मनिष सुमनले राज्य व्यवस्था समितिलाई प्रभावित गर्दै नेकपाले यस्तो निर्णय गरेको बताउनुभयो । नेपाली कांग्रेसका सांसद शिवचन्द्र चौधरीले विवाह गरेर आएको सात बर्षको बीचमा बच्चा जन्मियो र त्यहीं बीचमा महिलाका पतिको देहान्त भएमा महिलाले कसरी अधिकार पाउने भनी प्रश्न गर्नुभयो । उहाँले कुनै राजनीतिक कारणले सम्बन्ध बिथोल्ने कार्य कदापी मान्य नहुने बताउनुभयो ।
२०६३ को अन्तरिम संविधानकै आधारमा वैवाहिक अंगीकृत नागरिकता उपलब्ध गराउनुपर्ने उहाँले माग गर्नुभयो । जनता समाजवादीका सांसद चमेलीदेवी दासले बच्चाका आमा बुवाको जन्म दर्ता नभए बच्चाको जन्म दर्ता समेत नबनाउने गरिएको भन्दै यो दुःख ती महिलाका सन्तानले समेत भोग्नुपर्ने बताउनुभयो ।
उहाँले यो निर्णय नसच्चिए सम्पूर्ण महिला आन्दोलमा उत्रने बताउनुभयो । जनता समाजवादी पार्टीकै सांसद रानीशर्मा तिबारीले विवाह गरेको दिन महिलाका श्रीमानको केहि भयो भने महिलालाई ठूलो समस्या हुने भएकाले यो निर्णय कदापी नमान्ने बताउनुभयो ।
