कानिका डेस्क
असार ६, दाङ
लामो समयदेखि क्यान्सर रोगबाट पीडित प्रसिद्ध शिक्षासेवी तथा समाजसेवी अंगुरबाबा जोशीको ८९ वर्षको उमेरमा उपचारको क्रममा महाराजगन्जस्थित न्यूरो अस्पतालमा निधन भएको पारिवारिक स्रोतले जनाएको छ ।
नेपालको छात्रा शिक्षालाई जोशीको महत्वपूर्ण योगदान रहेको छ । उनकै अगुवाईमा काठमाडौंमा पद्म कन्या (पीके) क्याम्पसको स्थापना तथा जग्गा व्यवस्थापन भएको हो । उक्त क्याम्पसमा पढ्ने छात्राले पहिरिने पोशाक गेरु रंगको सारी र चोला जोशीले नै लागू गरेकी थिइन् ।
सन् १९३२ अगस्ट १५ मा काठमाडौंको डिल्लीबजारमा जन्मिएकि जोशीको कलिलै उमेरमा नेपालका पहिलो आणविक वैज्ञानिक बलराम जोशीसँग विवाह भएको थियो । त्यसपछि शिक्षाआर्जन गरेकी थिइन् ।
२००७ सालमा एसएलसी उत्तीर्ण गरेकी जोशीले पतिसँगै वनारसबाट राजनीति शास्त्र र संस्कृत विषयमा बिए सम्मका शिक्षा हासिल गरीन भने बेलायतबाट ब्यारिस्टर (कानुनमा अधिवक्ता) बन्ने पहिलो महिला समेत भइन्। साथै क्याम्पस प्रमुख बन्ने पहिलो नेपाली महिला पनि हुन् ।
जोशीको शनिबार पशुपतिस्थित आर्यघाटमा अन्त्येष्टि गरिने परिवारले जनाएको छ ।
