कनिका खबर
असार ८, दाङ ।
पछिल्लो अद्यावधिक अनुसार आज दाङमा थप १३ जनामा कोरोना सङ्क्रमण पुष्टि भएको छ । एक जना जनप्रतिनिधिसहित १३ जनामा कोरोना सङ्क्रमण पुष्टि भएको हो । घोराही उपमहानगरपालिकाको एक वडाको अध्यक्षमा कोरोना सङ्क्रमण पुष्टि भएको हो ।
राप्ती स्वास्थ्य विज्ञान प्रतिष्ठानमा गरिएको कोरोना परिक्षणका क्रममा घोराही उपमहानगरपालिका वडा नं. २ का वडा अध्यक्षमा कोरोना संक्रमण देखिएको हो ।
गएको जेठ २४ गते स्वाब सङ्कलन गरिएको र १६ दिनपछि रिपोर्ट आउँदा अध्यक्षमा पनि सङ्क्रमण देखिएको हो । यसैगरी वडा नम्बर २ का २ जना, वडा नम्बर ३ का २ जना, वडा नम्बर ५ का १ जना र वडा नम्बर ६ का ७ जनामा कोरोना पुष्टि भएको राप्ती स्वास्थ्य विज्ञान प्रतिष्ठानले जनाएको छ ।
योसँगै दाङमा कोरोना सङ्क्रमितको सङ्ख्या एक सय ४७ पुगेको छ । सङ्क्रमितमध्ये ४४ जना कोरोनामुक्त भएर घर फर्किएका छन् ।
