असार ३०, काठमाडौँ ।
पूर्वअर्थमन्त्री जनार्दन शर्मामाथि छानबिन गर्न गठित विशेष समितिका सदस्य हेरफेर गरिएको छ ।समितिमा सदस्य रहनुभएका नेपाली काँग्रेसका सचेतक पुष्पा भुसाललाई उपसभामुखको उम्मेदवार बनाए पछि सदस्य परिवर्तन गरिएको हो ।
काँग्रेसले उहाँको ठाउँमा अर्का सांसद मानबहादुर विश्वकर्मालाई राखेको छ । २२ असारमा गठित समितिमा सांसदहरू खगराज अधिकारी, देव गुरुङ, प्रदीप ज्ञवाली, भानुभक्त ढकाल, विमला विक, लक्ष्मणलाल कर्ण, शक्ति बस्नेत, सरला यादव, सीताराम महतो र सुरेन्द्र यादव छन् ।
यसैबीच, समितिले अर्थ मन्त्रालयका २ जना सचिवलाई छलफलका लागि बोलाएको छ।संसदीय विशेष समितिको आज बसेको बैठकले अर्थ मन्त्रालयका सचिव (अर्थ) मधु मरासिनी र राजश्व सचिव कृष्णहरि पुस्करलाई बोलाउने निर्णय गरेको हो।
उनीहरू दुबै जनालाई भोलिको बैठकमा बोलाउने निर्णय भएको हो । पूर्वअर्थमन्त्री शर्मासँग सम्बन्धित विषयका कागज तथा विवरण नआएपछि समितिले सचिवहरूसँग छलफल गर्न लागेको हो।