कनिका खबर
असार १४, दाङ ।
घोराहीका एक युवा व्यवसायीले आफ्नो जन्मदिन पारेर घोराही १५ स्थित क्वारअन्टिनमा रहेका नागरिकहरुलाई खाद्य सामग्री सहयोग गरेका छन् ।
घोराहीस्थित बेनेली मोटरसाईकल शो रुमका सञ्चालक सन्जिव पछाईँले आफ्नो जन्मदिनका अवसरमा घोराही १५ स्थित पद्मोदय पब्लिक नमुना मावि क्वारअन्टिनमा रहेका नागरिकहरुलाई खाद्य सामाग्री सहयोग गरेका हुन् । उनले घोराही १५ का वडा अध्यक्ष रमेश कुमार पाण्डेलाई क्वारअन्टिन स्थलमा चामल, दाल, नुन, तेल , अण्डा लगाएका खाद्य सामाग्री हस्तान्तरण गरेका हुन् ।
‘अहिले क्वारअन्टिनमा बसिरहनु भएका नागरिकहरुको खानपानमा थोरै भए पनि सहजता होओस् भन्ने उद्देश्यले मैले खाद्य सामग्री सहयोग गरेको हुँ,’ पछाईँले भने ‘जन्मदिनलाई सामाजिक कार्यमा उपयोग गरौँ भन्ने अभिलाषा जाग्यो ।’ सहयोग सामग्री बुझ्दै वडा अध्यक्ष पाण्डेले पछाईँले क्वारअन्टिनमा बसेकाहरुलाई गरेको सहयोगको प्रशंसा गरेका थिए । अहिले यो क्वारअन्टिनमा २२ जना नागरिक बस्दै आएका छन् ।
