मा प्रकाशित
कनिका संवाददाता
असार २६, काठमाडौं
कोरोना सङक्रमण रोकथामका लागि लागू गरिएको बन्दाबन्दीमा महिला तथा बालिकामाथि हुने हिंसाका घटनामा तुलनात्मक रुपमा वृद्धि भएको एक अध्ययनले देखाएको छ । बन्दाबन्दीको पछिल्लो तीन महिनामा मात्रै आठ सय ४३ महिला हिंसाका घटना भएको महिला पुनःस्थापना केन्द्र ओरेकले गरेको अध्ययनले देखाएको हो ।
अभिलेखकिरण भएका हिंसाका घटनामध्ये सबैभन्दा बढी ५८ प्रतिशत अर्थात चार सय ९० वटा घटना घरभित्रकै सदस्यको संलग्नतामा भएको पाइएको ओरेकका कार्यकारी निर्देशक लुभराज न्यौपानेले जानकारी दिनुभयो । ओरेकले सञ्चालन गरेको तीन हटलाइन, मनोविमर्शकर्ता, महिला मानवाधिकार रक्षक, साझेदार महिला सामुदायिक सङ संस्थामार्फत ६१ जिल्लाबाट यी घटना अभिलेखीकरण गरिएको र यीमध्ये एक सय १२ वटा घटना सञ्चारमाध्यमबाट संकलन गरिएको ओरेकले जनाएको छ ।
