कनिका खबर
साउन ३, सिन्धुपाल्चोक
सिन्धुपाल्चोकको मेलम्ची नगरपालिका चार थकनीमा गए रातिको अविरल बर्षाका कारण पहिरो जाँदा अमलेका माधबराज खनालको घर पुरिएको छ । त्यस क्षेत्रको बस्ती, डाँडा कठेरी लगायतका बस्ति उच्च जोखिममा परेको नगरपालिकाले जनाएको छ । अमले बस्तिका केदारनाथ खनाल, चिरञ्जीवी खनाल, दिपेश खनाल लगायत १२ घरमा पहिरोले पुर्ण रूपमा क्षति पु¥याएको र उक्त बस्ती नै स्थानान्तरण गर्नुपर्ने अवस्थामा रहेको स्थानीय पहिरो पीडित दिपेश खनालले जानकारी दिनुभयो । खनालका अनुसार मानवीय क्षति नभए पनि घरमा भएका सबै सर–सामान, लत्ताकपडा सबै नोक्सान भएको छ । पहिरो पीडितको स्थानीय जनप्रतिनिधिको सक्रियतामा सिन्धु सुरुङ्गमा सुरक्षार्थ खटिएका सशस्त्र प्रहरीले उद्धार गरेको र उनिहरुको वैकल्पिक बासस्थानको लागि छलफल भैरहेको स्थानीय जनप्रतिनिधि कृष्ण तामाङले जानकारी दिनुभयो । उहाँका अनुसार अमले, डाँडा कठेरी लगायत नगरपालिका चारका विभिन्न स्थानमा पहिरोका कारण ५० देखि ६० घर जोखिममा परेको र तिनलाई स्थानान्तरण गर्नुपर्ने अवस्था आएको छ । डाँडा कठेरीका बिस्थापितलाई तत्कालका लागि बिद्यालयमा बसोबासको प्रवन्ध मिलाइएको छ । स्थायी स्थानान्तरणका लागि सम्बन्धित निकायमा पहल गरिएको पनि तामाङले बताउनुभयो ।
मा प्रकाशित
