कनिका खबर
साउन १०, धादिङ
पृथ्वीराजमार्ग अन्तर्गत धादिङको गजुरी गाउँपालिका वडा नम्बर २ मलेखु पुलमा ११ लाख ५० हजारको लागतमा निर्माण गरिएको माछाको प्रतिमा आज अनावरण गरिएको छ । गजुरी गाउँपालिकाको नीति तथा कार्ययोजना अनुसार मलेखु पुलको मुखैमा माछाकोे प्रतिमा बनाइएको हो । गजुरी गाउँपालिकाले साँढे ६ लाखमा माछाको प्रतिमा खरिद गरी पिल्लर टायल र अन्य श्रम ज्याल गरी ११ लाख ५० हजारमा प्रतिमा बनाएको अध्यक्ष राजन्द्र विक्रम बस्नेतले बताउनुभयो ।
ललितपुरका कालीगढ बाबुराजा महर्जन र उहाँका छोरा अनिशको कला–कौशलबाट निर्मत ढलौटको माछाको प्रतिमा आज एक कार्यक्रमका बीच गाउँपालिकाका अध्यक्ष राजेन्द्र विक्रम बस्नेतले अनावरण गर्नुभएको हो । मलेखु बजारमा पहिलो पटक माछा ब्यवसाय गर्ने ४ जना पनि सम्मानित भएका छन् । सम्मानित हुनेहरुमा छविलाल मरहठ्ठा, विष्णुमाया मरहठ्ठा, एकराज सेढाई र टुल्कादेवी सेढाई रहेका छन् । अहिले गजुरी बजार र मलेखु बजारमा करिब २ सय ५० जना ब्यबसायीहरुले माछा ब्यवसाय गर्दै आइरहेका छन् ।
