कनिका खबर
साउन ११, काठमाडौं
नेकपा प्रवक्ता नारायणकाजी श्रेष्ठले पत्नी हत्याको अपराधमा जेल पठाइएका सशस्त्रका पूर्वडीआईजी रञ्जन कोइरालालाई सर्वोच्च अदालतबाट हालै भएको कैद छुटको फैसला र चितवनमा सेनाको कुटाइबाट राजकुमार चेपाङको मृत्यु भएको घटनामा असन्तुष्टि जनाउनुभएको छ । यसबारे नेकपाको औपचारिक धारणा आइनसकेका बेला प्रवक्ता श्रेष्ठले सामाजिक सञ्जाल फेसबुकमार्फत न्याय स्थापित हुनुपर्ने र दोषीमाथि कारबाही हुनुपर्ने माग गर्नुभएको छ । यो अवाजलाई समयमै सम्बोधन गर्न र राज्यका अंगको लोकतन्त्र अनुरुप पुनःसंरचना गरी लोकतन्त्रलाई व्यवहारतः अभ्यास गर्नुपर्ने र विकास गर्नुपर्नेमा उहाँले जोड दिनुभएको छ । अन्यथा निराशा, आक्रोश, अनिश्चय र तरलताको परिणाम के होला ? समयमै सबैले सोच्नुपर्ने नभए परिणाम सधैं सकारात्मक नै हुन्छ भन्न नसकिने उहाँको भनाइ छ । ‘के हुँदैछ यस्तो ? न्यायालय र सिंगै राज्य प्रणाली र व्यवस्थामाथि नै प्रश्न उठ्ने गरी न्यायालयद्वारा निर्णय किन गरिँदैछ ? बास र छाक टार्ने समस्याबाट पीडित गरीब चेपाङ युवाको हत्या संवेदनशील सुरक्षा अंगबाट नै दर्दनाक ढंगले पिटीपिटी किन गरिन्छ र सुकुम्बासी झुप्रामा आगो किन लगाइन्छ ? उहाँले लेख्नुभएको छ । सर्वोच्च अदालतको आदेशपछि आठवर्ष ६ महिना कैद सजाय भुक्तान गरेर सशस्त्र प्रहरीका पूर्वडीआईजी रञ्जन कोइराला बिहीबार जेलमुक्त भएका थिए । सर्वोच्च अदालतले १५ असारमा कोइरालाको सजाय घटाउँदै आठ वर्ष ६ महिना कायम गरेको थियो ।
मा प्रकाशित