कनिका खबर
साउन १२, काठमाडौं
नेपाली काँग्रेसका वरिष्ठ नेता रामचन्द्र पौडेल पक्षले सभापति शेरबहादुर देउवाले नै महाधिवेशनको आचारसंहिता उल्लंघन गरेको आरोप लगाएको छ । पौडेल पक्षले देउवाले आचारसंहिता उल्लंघन गरेको जनाउँदै उक्त निर्णयविरूद्ध आफ्ना पक्षीय केन्द्रीय समिति सदस्यहरुको बैठक बोलाउने तयारी गरेको छ । पौडेल पक्षका शीर्ष तहका नेताहरुको निरन्तरको बैठकपछि आफ्नो पक्षका केन्द्रीय सदस्यलाई भोली बैठकका लागि डाक्ने आन्तरिक तयारी गरेको हो ।
सभापति शेरबहादुर देउवाले गठन गरेको विभागप्रति तीव्र असहमति जनाउँदै आएको पौडेल समूहले हस्ताक्षरसहित देउवाको ध्यानाकर्षण गर्ने भएको छ । १४ औं महाधिवेशनको कार्यतालिका सार्वजनिक भइसकेको अवस्थामा विभागको गठन आचार संहिताको उल्लंघन भएको निर्क्यौल गरेको छ । विभाग गठनप्रति असन्तुष्टि राख्दै निर्वाचन समितिलाई ध्यानाकर्षण गराएको पौडेल पक्षले सभापति निर्णय फिर्ताको मागसहित देउवालाई हस्ताक्षर बुझाउने भएको हो ।
