घोराही,३१ साउन ।
विश्व बन्धुत्व दिवसको अवसरमा ब्रह्माकुमारी ईश्वरीय विश्व विद्यालय क्षेत्रीय कार्यालय, राप्तीक्षेत्र घोराहीले दाङमा बृहद रक्तदान अभियान सञ्चालन गर्ने भएको छ ।
‘१०० घण्टामा १ लाख रगत सङ्कलन’ भन्ने लक्ष्यसहित सुरु गरिएको अभियानअन्तर्गत विभिन्न दिन र स्थानमा रक्तदान कार्यक्रम हुने आयोजकले जनाएका छन् ।
कार्यक्रमअन्तर्गत २०८२ साल भदौ ६ गते शुक्रबार बिहान ७ बजेदेखि २ बजेसम्म घोराही शाखामा, त्यही दिन दिउँसो ३ बजेदेखि घोराही सिमेन्ट गोग्लीमा रक्तदान हुने छ । भदौ ७ गते शनिबार बिहान ७ बजेदेखि २ बजेसम्म सिद्ध रतननाथ माध्यमिक विद्यालय नारायणपुरमा कार्यक्रम तय गरिएको छ ।
त्यसैगरी भदौ ८ गते आइतबार बिहान ७ बजेदेखि १ बजेसम्म तुलसीपुर शाखामा तथा बिहान ८ बजेदेखि यातायात व्यवसायी समिति, बसपार्कमा रक्तदान हुने जनाइएको छ ।
आयोजक संस्थाले अभियानमा दाङका सर्वसाधारण, संघ–संस्था, विद्यार्थी र व्यवसायीलाई सहभागी भई मानवीय सेवामा हातेमालो गर्न आह्वान गरेको छ ।
