कनिका खवर
साउन २२, प्यूठान
समुदायस्तरमै कोरोनाको सङ्क्रमण फैलिएको आशंकामा प्यूठानका दुई वटा वडालाई पूर्ण रुपमा बन्द गरिएको छ । प्यूठान नगरपालिकाको वडा नम्बर ७ र ८ लाई पूण बन्द गरिएको हो । जनस्वास्थ्य प्रयोगशाला रुपन्देहीमा हिजो गरिएको कोरोना परीक्षणको क्रममा ५ जना मध्ये प्यूठान नगरपालिका ७ का २२ वर्षका एक जना महिलामा कोरोना सङ्क्रमण पुष्टी भएको हो । कोरोना सङ्क्रमणलाई थप समुदायमा फैलिन नदिन प्यूठानको प्रमुख व्यापारिक केन्द्र बागदुला, पुण्यखोला, मरन्ठाना, धाइरे लगायतका क्षेत्रलाई पूर्ण रुपमा बन्द गरिएको छ । नगर स्तरीय बैठकको निर्णय अनुसार आजदेखि २५ गतेसम्मका लागि वडाहरु बन्द गरिएको प्यूठान नगरपालिकाका प्रमुख अर्जुनकुमार कक्षपतिले बताए । उहाँले अत्यावश्यक काम बाहेक यातायात, पसल, उद्योग लगायतका सबै सेवा तथा क्षेत्र पूर्ण रुपमा बन्द गरिएको जानकारी दिए । सङ्क्रमित महिला होटल व्यवसायी भएकोले उनको सम्र्पकमा आएका छिमेकी तथा अन्य परिवारका सदस्यको स्वाब सङ्कलन गरी परीक्षणका लागि पठाउने तयारी भइरहेको स्वास्थ्य कार्यालय प्यूठानले जनाएको छ । सङ्क्रमितलाई महिलालाई नगरपालिकाको आइसोलेशनमा राखिएको छ । उनको अवस्था अहिले सामान्य रहेको छ । हालसम्म नगरपालिकामा मात्रै ९४ जनामा कोरोना सङ्क्रमण पुष्टी भएको छ भने जिल्ला भरि ३ सय ४२ जना सङ्क्रमित रहेका छन् । ३ सय ३४ जना सङ्क्रमण पश्चात उपचार गराएर स्वस्थ भइसकेका छन् ।
मा प्रकाशित