ज्ञानेन्द्र निरौला
साउन २४, झापा ।
समुदायमा कोरोना संक्रमण फैलिएपछि मेचीनगर नगरपालिकाका दुई वटा वडाका सबै उद्योग तथा पसलहरू अनिश्चितकालका लागि बन्द गरिएको छ । मेचीनगर ९ र १० का सबै क्षेत्रमा हिजोदेखि हिँडडुलमा समेत कडाई गरिएको मेचीनगर नगरपालिकाका प्रमुख बिमल आचार्यले जानकारी दिए । नगरस्तरीय कोरोना नियन्त्रण तथा रोकथाम कार्यदलले संक्रमण फैलिन नदिन मेचीनगर ९ र १० नम्बर वडाका सार्वजनिक गतिविधिहरू बन्द गर्ने निर्णय गरेको नगरप्रमुख आचार्यले बताए ।
खाद्यान्न र तरकारी पसलहरू अर्को सूचना नआएसम्मका लागि हरेक दिन बिहान ८ बजेदेखि १० बजेसम्म मात्र खोल्न पाइनेछ । त्यसैगरी बैंक तथा बित्तिय संस्था र औषधी पसल तथा अस्पतालहरू स्वास्थ्य सुरक्षाको पूर्ण पालना गरि नियमित सञ्चालन गर्ने नगरपालिकाले जनाएको छ ।