कनिका खबर
भदौ २, वाँके
कोरोनाका कारण बाँकेमा थप एक जनाको मृत्यु भएको छ । बाँकेका प्रमुख जिल्ला अधिकारी रामबहादुर कुरुम्वाङ्गले नेपालगञ्ज उपमहानगरपालिका–५ का ६२ बर्षिय एक जना पुरुषको गएराति करिब साढे ११ बजे नेपालगञ्ज मेडिकल कलेजको नेपालगञ्जस्थित शिक्षण अस्पतालमा मृत्यु भएको जानकारी दिनुभयो । जिल्ला स्वास्थ्य कार्यालय, बाँकेका कोरोना सम्पर्क व्यक्ति नरेश श्रेष्ठका अनुसार मृतकको दुवैतर्फको फोक्सोमा निमोनिया भएको थियो । उनलाई ३० साउनमा लक्षण देखिएपछि परिवारका सदस्यले ३२ साउनमा उपचारका लागि नेपालगञ्ज मेडिकल कलेज, शिक्षण अस्पताल नेपालगञ्जमा भर्ना गरेका थिए । कोरोनाको लक्षण देखिएपछि अस्पतालको आइसोलेसनमा राखेर उनको उपचार शुरु गर्नुका साथै पिसिआर जाँचका लागि स्वाब लिइएको नेपालगञ्ज मेडिकल कलेज शिक्षण अस्पतालले जनाएको छ । हिजो उनको रिपोर्टमा कारोना पुष्टि भएको थियो ।
नेपालगञ्ज मेडिकल कलेज नेपालगञ्ज शिक्षण अस्पतालका सह निर्देशक डा रोमन किदवाईका अनुसार मृतकलाई कोराना भएको पुष्टि भएपछि प्लाज्माका लागि सङ्क्रमणबाट निको भएकालाई रगत दिन आह्वान गरिएको थियो । तर कसैले पनि ए पोजेटिभ रगत नदिएपछि ती व्यक्तिको उपचार अगाडि बढ्न सकेको थिएन ।