कनिका खबर
भदौ २, सिन्धुपाल्चोक
सिन्धुपाल्चोकमा कार्यरत गैरसरकारी संस्था सामुदायिक विकास तथा वातावरण संरक्षण मञ्च (सिडिइसिएफ) का चार जना कर्मचारीमा कोरोना सङक्रमण पुष्टि भएको मध्ये दुईजना मेलम्चीको क्षेत्रीय आइसोलेसनमा बसेकाछन् । तर, सदरमुकाम चौतारामा रहेका सङक्रमितलाई व्यवस्थापन गर्न नसक्दा प्रहरीले पहरा दिएर कार्यालयमै राखेको छ । उनीहरूलाई हिजो बसेको संकट व्यवस्थापन समितिको बैठकले चौतारा अस्पताल राख्ने निर्णय गरेको थियो । तर, अहिलेसम्म राख्न सकिएको छैन । चौतारा साँगाचोकगढी नगरपालिकाले कोरोनाका नाममा ९० लाख भन्दामाथि खर्चिएको छ । जिल्लामा ८ सय १७ वेडको क्वारेन्टाइन र ७० बेडको आइसोलेसन रहेको तथ्यांक छ । तर यी दुई सङक्रमितले आइसोलेसन बेड पाउन सकेका छैनन् । उनीहरूमा कोरोना देखिएपछि चौतारा साँगाचोकगढी नगरपालिका ५ किसानटोलको घर, संस्थाका कर्मचारी खाजा, खाना खाने स्थानीय बाबुकाजी श्रेष्ठ र नारायण श्रेष्ठको होटललाई सिल गरिएको प्रमुख जिल्ला अधिकारी उमेशकुमार ढकालले जानकारी दिनुभयो । कोरोना संक्रमण पुष्टि भएपछि सिडिईसिएफका १ महिला र १ पुरुषलाई मेलम्चीको बाहुनेपाटीस्थित आइसोलेशन र १ महिला र १ पुरुषलाई चौतारा अस्पतालको आइसोलेशनमा राख्ने निर्णय भएको थियो। तर, चौतारामा रहेका दुईजनाले आइसोलेसन बेडपाउन नसकेका हुन् ।
कोरोना सङक्रमित भएकाहरु चितवनमा एक तालिममा सहभागी भई साउन २८ सिन्धुपाल्चोक पुगेका थिए ।
