कनिका खबर
भदौ ३, दाङ
चीनको औषधि उत्पादक कम्पनी सिनोफार्मले यसै वर्षको अन्त्यसम्म कोरोना भाइरस विरुद्धको खोप बनाइसक्ने दावी गरेको छ । सिनोफार्मका अध्यक्ष लिउ जिङ्गझेनका अनुसार कोरोना भाइरस विरुद्धको खोपको तेस्रो चरणको परीक्षण संयुक्त अरब इमिरेट्स (युएई) मा जारी रहेको र यसको नतिजा डिसेम्बरसम्म आइसक्नेछ । खोप परीक्षणको क्रममा लिउले आफूले पनि खोपको दुई वटा डोज लगाएको जानकारी दिनुभयो । उहाँले ग्लोबल टाइम्सलाई दिएको जानकारी अनुसार अहिलेसम्म खोपको कुनैपनि नकारात्मक असर आफूले अनुभव नगरेको पनि दावी गर्नुभयो ।
चीनको बेइजिङ्ग र वुहान शहरमा रहेको यस कम्पनीले एक वर्षमा १० करोड २ लाखसम्म खोप उत्पादन गर्ने गर्न सक्ने भन्दै लिउले यस खोपको दुई डोजको मूल्य एक हजार युआन अर्थात् १० हजार ७ सय रुपैयाँ पर्ने बताउनुभयो । हाल विश्वभर झन्डै २ सय कोरोना विरुद्धको खोपमाथि परीक्षण जारी छ । जसमा २० भन्दा बढी खोप मानव परीक्षणका लागि तयार भइसकेको छ ।
