कनिका खबर
भदौ ४, सिन्धुपाल्चोक
वाढिले घर बगाएपछि जोखिममा रहेका सिन्धुपाल्चोक भोटेकोसि गाउँपालिका लार्चाका एक सय ५५ जना घरपरिवार लामो समयदेखि भन्सार कार्यालयकै शरणमा बस्दै आएका छन् । घरबार गुमाएका यी परिवारलाई तत्काललाई खाना बस्नको समस्या नभए पनि कति दिन कार्यालयले शरण दिन्छ भन्ने चिन्ताले पिरोलिरहेको पीडित परिवारले गुनासो गरेका छन् । विस्थापित परिवारलाई तत्काल सुरक्षित बस्ने ठाउँ नहुँदा भन्सार कार्यालयले शरण दिएको हो ।
अब छिटै सडक खुलेपछि भन्सार कारोबार नियमित सञ्चालनमा आउने हुँदा विस्थापित परिवारले अहिले शरण लिएको स्थान छोड्नुपर्नेछ । बाह्रबिसेको जम्बु र खागदल बाढीपहिरोले बगेको दिन देखि भोटेकोसी गाउँपालिकामा निरन्तर पहिरो गइरहेको छ । गाउँपालिकाभर दिनदिनै प्राकृतिक विपत्तिले जनधनको क्षति भइरहेको अवस्थामा विस्थापित परिवारलाई गाउँपालिकाले अन्यत्र स्थानान्तरण गर्न नसकेको हो । बाढी पहिरोका कारण विस्तापित अन्य परिवार अहिले विभिन्न विद्यालय, कार्यालय र आफन्तको शरणमा छन् ।
