कनिका खबर
भदौं १२, भक्तपुर
काठमाडौं उपत्यकामा कोभिड–१९ का बिरामीको संख्याया बढेसँगै भक्तपुर अस्पताललाई पूर्णतः कोरोनाका बिरामीको उपचार गर्ने अस्पताल बनाइएको छ । हिजोबाट अस्पतालमा भएका सबै पूर्वाधार कोरोनाका बिरामीको उपचारमा प्रयोग गर्न थालिएको अस्पतालका मेडिकल सुपरिटेन्डेन्ट डा. सुमित्रा गौतमले जानकारी दिनुभयो । हाल अस्पतालमा कोरोनाको लक्षण नदेखिएका सङ्क्रमितलाई राख्न दस शय्या र लक्षण देखिएका बिरामीलाई राख्न पन्ध्र शय्याको व्यवस्था मिलाइएको उहाँले बताउनुभयो । त्यसबाहेक अब अस्पतालका अन्य ठाउँमा क्रमशः कोरोनाका सङ्क्रमितको उपचारको निम्ति व्यवस्था गर्न लागिएको पनि गौतमले जानकारी दिनुभयो । देशकै पुरानो अस्पतालमध्येको एक भक्तपुर अस्पतालमा अब सघन उपचार कक्ष (आईसीयू) सेवा पनि विस्तार हुने भएको छ । तत्काललाई पाँच वटा आईसीयू शय्या तयारी अवस्थामा रहेको मेडिकल सुपरिटेन्डेन्ट डा. गौतमले बताउनुभयो । यस्तै अस्पतालले सहिद धर्मभक्त मानव अङ्ग प्रत्यारोपण अस्पताल र भक्तपुर क्यान्सर अस्पतालसँग मिलेर आईसीयू सञ्चालन गर्ने टोलीको तयारी समेत गरेको समेत उहाँले बताउनुभयो ।
मा प्रकाशित
