कनिका संवाददाता
जेठ १, दाङ ।
घोराही उपमहानगरपालिका वडा नं. ५ मा एक सय बढी बिपन्न घर परिवारलाई खाद्यान्न वितरण गरिएको छ । लकडाउनका कारण समस्यामा परेका घरपरिवारलाई घोराही उपमहानगरपालिकाको सहयोगमा वडा कार्यालयले दोश्रो चरणको राहत सहयोग कार्यक्रम अन्तर्गत बिहीबार वडा कार्यालयबाट एक सय २० विपिन्न घर परिवारलाई खाद्यान्न सहयोग गरेको हो ।
विश्वव्यापी रुपमा फैलिएको कोरोना भाइरसको महामारीका कारण दैनिक जीविका चलाउन समस्या परेका वडाका अति विपन्न घरपरिवारलाई वडा कार्यालयले चामल, नून र हात धुनलाई सावुन वितरण गरेको घोराही उपमहानगरपालिका वडा नं. ५ का वडा सचिव लक्ष्मण अधिकारीले जानकारी दिएका छन । सचिव अधिकारीका अनुसार वडा कार्यालयले दोश्रो चरणको सहयोग कार्यक्रम अन्तर्गत पहिलो दिन वडाका विपन्न घरपरिवारलाई प्रति व्यक्ति पाँच किलो चामल, एक प्याकेट नून र एउटा सावन सहयोग गरेको हो । उक्त खाद्यान्न वडा अध्यक्ष बिष्णुमणी दाहालले विपन्न परिवारलाई हस्तान्तरण गरेका थिए ।
राहत वितरण कार्यक्रममा वडा अध्यक्ष दाहालसँगै घोराही उपमहानगरपालिका कार्यपालिका सदस्य, वडा सदस्यहरु, सचिव, प्राविधिक, कर्मचारीसँगै वडाका विभिन्न टोल विकास सस्थाका अध्यक्षहरुको सहभागिता रहेको थियो । वडा कार्यालयले पहिलो चरणको कार्यक्रम अन्तर्गत वडाका दुई सय ८५ घर परिवारलाई खाद्यान्न उपलव्ध गराएको थियो । वडा कार्यालयले विभिन्न संघसस्थाहरुको सहयोगमा वडाका दुई सय ८५ विपन्न घर परिवारलाई चामल, दाल,नून, तेल,सावुनलगायतका सामग्री पहिलो चरणमा सहयोग गरेको वडा अध्यक्ष बिष्णुमणि दाहालले जानकारी दिएका छन
