कनिका खबर
माघ २८, नुवाकोट
नुवाकोटका विभिन्न तीन जना कृषकहरुलाई राष्ट्रपति कृषक पुरस्कार प्रदान गरिएको छ । कृषि ज्ञान केन्द्र नुवाकोटले ३ जना कृषकलाई “राष्ट्रपति उत्कृष्ट कृषक पुरस्कार” प्रदान गरेको हो । पुरस्कृत हुनेहरुमा म्यागङ गाउँपालिका ४ स्थित किम्ताङ अर्गानिक चिया उद्योगका सञ्चालक सार्की सुनार, दुप्चेश्वर गाउँपालिका ३ स्थित शिखादेवी कृषि फार्मका सञ्चालक रामकृष्ण थापा र ककनी गाउँपालिका ५ स्थित मोक्तान कृषि फार्मका सञ्चालक शिवकुमार लामा रहेका छन् । विदुरमा आयोजित एक कार्यक्रमकाबीच उनीहरुलाई प्रमाण–पत्रसहित नगद १०–१० हजार रुपैयाँ पुरस्कार प्रदान गरिएको हो । कृषि ज्ञान केन्द्र नुवाकोटको चालु आर्थिक वर्ष २०७७–०७८ को स्वीकृत वार्षिक कार्यक्रम अन्तर्गत रहेर छनौटमा परेका तीन जना कृषकलाई “राष्ट्रपति उत्कृष्ट कृषक पुरस्कार” प्रदान गरिएको हो । आधुनिकिकरण कृषि प्रणाली अपनाएर व्यवसायिक रुपमा कृषि पेशा अवलम्बन गरिरहेकाहरुलाई हौसला प्रदान गर्न “राष्ट्रपति उत्कृष्ट कृषक पुरस्कार” प्रदान गरिदै आएको छ । पुरस्कार प्रदानको लागि उत्कृष्ट किसान छनौट गर्न गत असोज १ गते राष्ट्रपति उत्कृष्ट कृषक पुरस्कार कार्यन्वयन कार्यविधि २०७१ अनुसार कृषि ज्ञान केन्द्र नुवाकोटले सूचना सार्वजनिक गरेको थियो । सोही सूचना अनुसार १९ वटा आवेदन परेको थियो । आवेदनको आधारमा जिल्ला समन्वय अधिकारी कृष्णप्रसाद पन्थीको संयोजकत्वमा प्राविधिक टोलीको अनुगमन तथा मूल्याङ्कनपछि तीन जना उत्कृष्ट किसान छनौट गरिएको कृषि ज्ञान केन्द्र नुवाकोटले जनाएको छ ।
मा प्रकाशित
