कनिका खबर
माघ २९, दाङ कठमाडौं
नेकपा प्रचण्ड–माधव समूहकी नेतृ रामकुमारी झाँक्रीले आफूलाई नियन्त्रणमा लिने भए पक्राउ पूर्जी लिएर आउन प्रहरीलाई आग्रह गरेकी छन् ।
गोरखामा राष्ट्रपति विद्यादेवी भण्डारीबारे दिएको अभिव्यक्तिलाई लिएर प्रहरीले उनलाई सोधपुछका लागि बोलाएको छ । महानगरीय अपराध महाशाखाका प्रमुख एसएसपी दीपक थापाले फोन गरेर बोलाएको नेतृ झाँक्रीले स्वीकार गरिन् ।
‘मैले यो राजनीतिक मुद्दा हो । सडकमा लडिरहेका छौं, यसको प्रतिवाद गर्छौं भने,’ उनले निवासमा पत्रकारहरुसँग कुरा गर्दै भनिन्, ‘यो कानूनी पनि विषय भयो, त्यसकारण पक्राउ पूर्जी जारी गर्नुस्, आउनुस् भनेको छु ।’
उनले अघि भनिन्, ‘राज्यले नागरिकलाई नियन्त्रणमा लिनसक्छ । उहाँहरुले चाह्यो भने विनाकारण पनि २४ घण्टासम्म थुन्नसक्छ । तर यो राजनीतिक मुद्दा भएकाले उहाँले कारणसहित पूर्जीसहित आउनुभयो भने मैले गिरफ्तारी दिनुपर्छ ।’
राजनीतिक अभिव्यक्तिलाई लिएर कसैलाई पक्राउ गर्न खोज्नु लोकतन्त्रकंो उपहास भएको उनले बताइन् । प्रतिनिधिसभा विघटनविरुद्ध राजनीतिक कार्यक्रमहरुमा हिडिरहेको भन्दै उलले भनिन्, ‘अलि धेरै हिँडेको ह्यारेसमेन्ट गर्न खोजेको होला ।’
तपाईँलाई नै किन तारो बनाए त भन्ने प्रश्नमा उनले तानाशाहहरु ढल्ने बेलामा यस्तो हुने बताइन् । कमिलाको पनि प्वाँख आउँछ भने झै तानाशाहहरुले ढल्ने बेला ननइश्यूलाई पनि इश्यू बनाउने भन्दै उनले भनिन्, ‘यो कुनै मुद्दा नै होइन । यो राजनीति हो । प्रधानमन्त्रीले प्रतिगमन गर्नुभयो र राष्ट्रपति त्यसको मतियार हुनुभयो भनेर हामीले सडकबाटै लल्कारेर लडिरहेका छौं ।’
२०६२र३६ को जनआन्दोलनमा सक्रिय भूमिका खेलेकी झाँक्रीको शंखमुलस्थित निवास बाहिर विहानबाटै सादा पोशाकमा सुरक्षाकर्मी समेत परिचालन गरिएको थियो । अहिले उल्लेख्य संख्यामा प्रहरीहरु तैनाथ छन् । रामकुमारीलाई पक्राउ गर्न आएको विरोधमा नेकपा कार्यकर्ताहरुले सरकार र प्रहरी प्रशासनविरुद्ध नाराबाजी गरिरहेका छन् ।
प्रहरी बाहिर, परिवार भित्र हुँदा कस्तो हुँदोरहेछ भन्ने सञ्चारकर्मीहरुको प्रश्नमा उनले भनिन्, ‘व्यवस्था खोसिसकेको हो कि भन्ने लाग्यो ।’
