काठमाडौँ । त्रिविका उपकुलपति प्रा. डा. दीपक अर्याल, रेक्टर प्रा. डा. खड्ग केसी र प्रा. डा. रजिस्ट्रार केदारप्रसाद रिजालले सामुहिक राजीनामा दिएका छन् ।
विहिबार उनीहरुले कुलपतिसमेत रहेका प्रधानमन्त्री बालेन्द्र शाहलाई राजीनामा बुझाएका हुन् ।
त्रिवि पदाधिकारीको कार्यकाल ४ वर्षको हुने भए पनि सरकारले सबै राजनीतिक नियुक्ति खारेज गर्ने व्यवस्थासहितको अध्यादेश राष्ट्रपतिसमक्ष सिफारिस गरेपछि त्रिविका पदाधिकारीहरूले सहजीकरण गर्दै सामुहिक राजीनामा दिएको बताएका छन् ।
तत्कालिन प्रधानमन्त्री केपी शर्मा ओली नेतृत्वको सरकारले उपकुलपति अर्याललाई २०८२ को असार २५ मा नियुक्त गरेको थियो । शिक्षाध्यक्ष केसी र रजिस्ट्रार रिजाल पुष्पकमल दाहाल प्रचण्ड प्रधानमन्त्री भएको बेला नियुक्त भएका थिए । तत्कालीन उपकुलपति प्रा.डा. केशरजंग बरालको सिफारिसमा रिजाल र केसीलाई २०८० को चैत ३० मा तत्कालीन प्रधानमन्त्री प्रचण्डले नियुक्त गरेका थिए ।
