इतिहासमा कम्युनिस्ट पार्टी बनाउँदा काङ्ग्रेस पार्टी कार्यालयका तात्कालीन सचिव पुस्प्पलाल श्रेष्ठको एउटै निचोड थियो — यो काङ्ग्रेस पार्टीले न गरिब जनताको भलो गर्न सक्छ न सामन्ती सत्ता ढाल्न सक्छ । तर आज त्यही बिरासतमा जन्मेको पार्टी ७१ बर्षमा आइपुग्दा बोइलर कुखुरा पाल्न बनाइएको फर्म चलाउन दर्ता भएको कम्पनी लिमिटेड जस्तो भएको छ । ब्यक्तिको पछि बलिदानी र इतिहास न्याच्छयावर गर्ने र जनताको मुद्दा भुसुक्कै बिर्सने पार्टी कम्तिमा नि पुष्पलालको पार्टी त हुनै सक्दैन । शैलीका हिसाबले मुसोलिनी जस्तो,खोक्रो राष्ट्रबादका हिसाबले हिटलर र नाजी जस्तो अनि कार्यशैलीका हिसाबले पोलपोट जस्तो पार्टी गणतन्त्रको उत्पादन कसरी हुनसक्छ ? पढाइ छोडेका,पञ्चायत र काङ्ग्रेसले दुख दिएर थातथलो छोडेका अनि जनताको मुक्तिका लागि साँच्चै हतियार बोकेका इमानदार कार्यकर्ताको पार्टी यस्तो हुन्छ ?अमेरिकामा आफ्नै पार्टीका तर्फबाट रास्ट्रपतिका उम्मेदवार डोनाल्ड ट्रम्पलाई मात्र ७८५रिपब्लिकनको समर्थन छ,अनि तिमी कंश भए नि हिरण्य कसिपु भए नि आफ्नै नेता भन्ने ? इमानको बिनिमय र जमिरको मृत्युुको सट्टा आत्महत्या गर कसरी भनुँ?
कम्युनिस्ट पार्टी भनेको सामुहिक नेतृत्व र ब्यक्तिगत जिम्मेवारी हो । अहिलेको नेकपा ब्यक्तिगत नेतृत्व अनि सामुहिक जिम्मेवारी भएको छ । एउटाले बेइमानी गर्ने र कुल सन्तान पिर्ने पार्टी हो भन्छन् — नेकपा । आँखामा पट्टि बाँधेका स्वार्थी र झर्ला अनि खाँउला भनेर ढुक्ने ढाडे बिरालाहरुको नेतृत्व नामको जमातमा बिबेकहीन गुटीय कार्यकर्ताको भीड हो पनि भन्न थालिएको छ ।कोभिडले जनता आलसतालसमा परेका बेला ७९ दिनसम्म सिङ्ग जुधाएर भागबण्डामा राज्यश्रोत र कोशमा अंशियारी गर्ने सत्ता हो यो भन्ने दृस्टान्तको क्लाइमेक्सको सुटिङ हुँदैछ अहिले । अहिलेको मुख्य सचिबको राजीनामाको नाटक,नयाँ मुख्य सचिबको नियुक्ति अनि राजदुतमा सिफारिस भागबन्डाको शृंखला हो,यो सुरु हो अन्तिम होइन । संबैधानिक नियुक्तिका बेला देख्न पाइनेछ बर्तमान सत्ता र पार्टीहरुको नाङ्गो नाच । त्यतिबेला उनीहरु लजाउने छैनन् जनता अनि इमान्दार कार्यकर्ताले लाजले मुख छोप्नुपर्नेछ । अनि मैले त्यतिबेला कम्तिमा नि इमानदारीको मुकाम आत्महत्या कसरी भन्नू ?
मदन भण्डारीले दलीय पद्धति अनि खुला प्रतिस्पर्धा मार्फत श्रेष्ठता हासिल गर्ने विधि तय गरेको पार्टीमा उनैका नक्कली सन्तानहरुले आज भण्डारीको बिचारको हत्या गरेका छन् । सत्तामा पुगेसी नियुक्त गरिएका कार्यकर्ताका एकएक बहि खाता पल्टाएर हेर । तिनका आन्दोलन र युद्दमा योगदान हेर । अधिकांस पन्चायतका मण्डले,बिचौलिया अनि हिजो आन्दोलनका बेला दुला पसेका र कालो धन्दा गरेका सरकारका रोजाई अनि कस्तो कम्युनिस्ट पार्टी तिम्रो ? तिमी जहिले नि पार्टीको गीत गाईरहनु पर्ने अनि नियुक्ति जति आसेपासे,हुक्के र बैठकेले खाने । अनि तिनका पक्षमा तिमीले शुभकामना र बधाई दिएर रातभरि अनिदो सुत्नुपर्ने । कम्तिमा नि तिम्रो नेतृत्वलाई भन यो देश हो तिम्रो मौजा हैन नि । सामाजिक सन्जालमा तिम्रो गीत गाउने र अरुलाई निबस्त्र गाली गर्नेदेखि म त पदमा भैन भने त कोरोनाले समाती हाल्छ नि भनेर छाँद हाल्नेले मात्र हो नियुक्ति पाउने ? पढ्ने बेलामा किताब फाल्न लाएर सामन्तका नाममा आफन्त काट्न लगायौ अनि अहिले हामी कतारको तातोमा र बिचौलिया,मण्डले अनि काला व्यापारी चाहिँ सिंहदरबार र टारमा भनेर सोध्न सक्छौ ? सक्दैनौ भने मैले आत्महत्या गर भन्नू?
कि तिम्रा पार्टीका असल कार्यकर्ताले पाएको विद्यावारिधी नक्कली हो? तीन लाखमा लाहुरबाट किनेर ल्याको त होइन नि? नत्र डाक्टरको नाममा डाका शैलीको भाषा र बिगत भएकाको नियुक्तिले तिम्रो पार्टी त बदनाम भयो नै, तिम्रो राजनीतिक भबिष्य भारतको भाकपा बन्ने निश्चित छ । अनि तिमी त्यतिबेला जमानत नजोगिने चुनाब लड्ने प्यादा बन्छौ कि नेतृत्वलाई सोध्छौ —हाम्रो योग्यता र क्षमता तिम्रो भाषणमा ताली मार्ने मात्र हो ?
हुन त तिम्रो आस्था ७२ करोडको सर्पको विषले समन गरिसक्यो, बुहारीको मुस्कानको सप्कोमा परिसक्यो, सम्धीको हुँकारमा बिलिन भैसक्यो भनेर बिरोधीहरु आरोप लगाउँछन् तर पनि तिम्रा परिवारका सहिदले प्रश्न सोध्दा तिमी के जवाफ दिन्छौ हँ । रत्नकुमार बान्तवाहरुको सुराकी गर्नेले एकपछि अर्को नियुक्ति पाउने अनि आन्दोलनमा महेन्द्रको सालिक तोड्न जाँदा गोली खाएको र अहिले भोकले खुलामञ्चमा बाबुराम भान्छेले बाँडेको भात खाएको बिचरा तिम्रो नालायक समर्थकलाई के जवाफ दिन्छौ हँ?
तिम्रा महाराजा त युबराजको मायामा पानी पानी भैसके भन्ने गुनासोको के जवाफ दिन्छौ ? तिम्रा नेता त खुसी छन् त्यो खाली भएको कुर्सीमा छ्याकन खाएर एउटा बिचौलिया नियुक्त गर्न सिफारिसै गर्न पाइयो भने पनि दुई महिना केटाकेटीको बिदेश फी पठाउन पाइन्छ कि भन्ने दाउ छ यिनको । तर त्यो भ्रममा सुतेका तिम्रा पेटी ठेकेदारलाई यति गोठका मालिकले ढुकुटीको चाबी आफ्नै मालपोतको जग्गा फिर्ता गर्ने इमान्दार कारिन्दा बाहेकलाई दिन्नन् भन्ने होसै छैन । अनि तिमी तिनै लालचिका भेडा बनेर बसिरहन्छौ ? बिद्रोह तिमी गर्न सक्दैनौ तर बोल न हौ तिम्रो इमान मरेको हो ? इमानको श्राद्ध नै त गरेको त होइन होला नि ती सिजदेखि झापाको पानी खाएकाहरुको ? तिमी जत्तिको लगनशीललाई ठगहरुले बिलोको भाउमा भाग लगाइसके । तिमी सुतेको नाटक गरेर कति सुँक्क सुँक्क नाक बजाउँछौ हँ? नेताले लाजको डाँडी भाँचिसके तिमी पार्टीको भाङ्ग्रो कति च्याप्छौ हँ? यत्रो लामो जिवन दास भएर बाँच्नुभन्दा इमान्दारले आत्महत्या गरेको बेस भन्ने दिन आयो ? होइन भने बोल,उठ,दलको दलदलबाट माथी आउ, देश रहे सब रहन्छ ,अफगानिस्तान बनाए भने पछुताउनुको विकल्प के हुन्छ र ?
