कनिका खबर
असोज १७, दाङ ।
प्रदेश नं. ५ को स्थायी राजधानीको क्षेत्र प्रस्तावसँगै त्यस क्षेत्रमा हुने जग्गाको चलखेललाई रोक्नका लागि जग्ग किनबेच तथा कित्ता काट अनिश्चितकालका लागि रोक्का गरिएको छ । प्रदेश ५ को राजधानी दाङको भालुबाङलाई केन्द्र बनाउने र लम्बिनी प्रदेश नाम रहने गरी प्रस्ताव गरिएको छ ।
प्रदेश मन्त्रिपरिषद बैठकले दाङ जिल्लाको राप्ती गाउँपालिकाका सबै वडा, गढवा गाउँपालिकाका वडा नं. १, २ र ३ तथा अर्घाखाँचीको शीतगंगा नगरपालिकाका वडा नं. ८ र ९ मा जग्गा कारोबार रोक्का गर्ने निर्णय गरेको हो ।
प्रदेश ५ को मुख्यमन्त्री तथा मन्त्रिपरिषद कार्यालयका सचिव भरतमणि सुवेदीले अर्को आदेश नभएसम्मका लागि ती क्षेत्रमा जग्गाको किनबेच र कित्ताकाट रोक्का गरिएको जानकारी दिए । मन्त्रिपरिषद बैठकले दाङ र अर्घाखाँचीका मालपोत कार्यालयलाई जग्गाको किनबेच र कित्ताकाट रोक्न पत्राचार गरिसकेको छ ।
