कनिका खबर
असाेज २०, कैलाली ।
साहित्यकार श्रेष्ठ प्रिया पत्थरले मरणोपरान्त नेत्र दान गर्ने भएकी छिन् । उनले असाेज १८ गते गेटा आँखा अस्पताल आँखा सङ्कलन केन्द्रमा आँखा दान इच्छा पत्रकाे फाराम भरेकी हुन् । कैलालीकी श्रेष्ठ बरिष्ठ साहित्यकार हुन् ।
आँखा दान इच्छा पत्रकाे फाराम भरेपछि उनले सामाजिक सञ्जाल फेसबुकमा लेखेकी छिन्, `जन्मेपछि एक दिन मर्नै पर्छ । आत्मा अनन्तमा, नश्वर शरीर माटोमा विलिन हुन्छ । यो शाश्वत सत्य हो । मरेपछि ऊ स्वर्गमा जान्छ कि नर्कमा, कसैले यकिन गरेर भन्न सक्तैन । चित्रगुप्तले पाप र पूण्यको लेखा राख्छ्न् कि राख्तैनन् त्यो पनि थाहा छैन । पुनर्जन्म र परलोकको कुरा त झन् कल्पनातित । त्यसैले कुनै असल कर्म गर्नु छ भने यसै जुनीमा आफ्नो होसहवास छँदै गर्नु राम्रो । दानहरुमा उत्तमदान नेत्रदान भएको हुँदा आज मरणोपरान्त नेत्रदानको लागि फाराम भरियो । मृत्युपरान्त मेरो आँखाबाट कुनै नेत्र विहिनले संसार देख्न सकोस् , यसैमा मेरो सन्तुष्टि रहनेछ ।
माटोमा मिल्ने मृत शरीरको के मोह !´
