कनिका खबर
असोज २१, दाङ ।
प्रदेश नंं. ५ को स्थायी राजधानी दाङको भालुवाङ रहने प्रस्ताव प्रदेश सभाबाट दुई तिहाइले पारित भएपछि दाङ लगायतका जिल्लामा खुशीयाली छायो । हिजो मंगलबार प्रदेश सभामा भएको मतदानबाट प्रदेशको नाम लुम्बिनी प्रदेश र राजधानी राप्ती उपत्यका दाङको भालुवाङलाई केन्द्र मानेर बनाउने प्रस्ताब पारित भएको हो ।
द्वन्द्व कालमा केन्द्रीय राजधानीको समेत चर्चा बटुलेको दाङले मुलुक संघीयतामा गएपछि प्रादेशिक राजधानीको बलियो सम्भावना बोक्दाबोक्दै पनि अस्थायी राजधानी बुटवल तोकिएपछि राजधानी बन्नबाट रोकिएको थियो । दाङलाई राजधानी बनाउनका लागि भएका बहस, सङ्घर्ष, बौद्धिक सङ्घर्ष, सडक सङक सङ्घर्ष मत्थर भएको अवस्था र मुलुक कोरोनाको महामारीमा परेको बेला प्रदेश सरकारले दाङको सम्भावनाको विकल्प नभएको भन्दै दाङको भालुवाङ क्षेत्रलाई प्रस्ताव गरेको थियो ।
प्रदेश नं. ५ को स्थायी राजधानी दाङको भालुवाङ लगायत त्यस आसपासका क्षेत्रलाई समेटेर बनाउने सहमति जुटेपछि प्रदेश ५ को राजधानी दाङ भएको हो । मतमतान्तरका बिच हिजो प्रदेश सभामा पक्षर विपक्षमा मतदान हुँदा पक्षमा ६९ मत र विपक्षमा १३ मत खसेको थियो । कुल ८७ मतमा ८२ मत खसेको हो ।
यता दाङ राजधानी हुने प्रस्ताव दुई तिहाइले पारित भएपछि हिजो बेलुका दाङका विभिन्न स्थानमा दीपावली गरियो ।
विभिन्न संघ संस्थाले खुशियालीका साथ दीपावली गरेका हुन् । कोरोना भाइरसको सङ्क्रमणको महामारीका बिच भएको दीपावलीका क्रममा उपस्थित भीडले कोरोना कहर बिर्सिएको आभास दिलाएको थियो ।
बजार तथा भीडभाडमा अपनाइने सतर्कता दीपावलीका क्रममा वास्ता नै गरिएन । दीपावलीको क्रममा न त सामाजिक दूरी कायम भयो न त कोरोनाको जोखिमबाट बच्नका लागि कुनै सतर्कता नै अपनाइएको थियो ।