कनिका खबर
असोज २४, दाङ ।
सत्तारुढ दल नेकपाकी सचेतक शान्ता चौधरीलाई थप उपचारका लागि आईसीयूमा सारिएको छ । सचेतक चौधरीलाई कोरोना भाइरस सङ्क्रमण पुष्टि भएपछि उपचारका लागि काठमाडौँस्थित वीर अस्पतालमा लगिएको हो । चौथो दिनसम्म पनि स्वास्थ्यमा सुधार नदेखिएपछि हिजो शुक्रबारदेखि उनलाई थप उपचारका लागि आइसियुमा सारिएको हो ।
वीर अस्पतालमा उपचाररत चौधरीलाई श्वासप्रश्वासमा समस्या भएपछि आईसीयूमा सारिएको उनको सचिवालयले जनाएको छ । श्वासप्रश्वासमा कठिनाइ भएको उनले तीन दिनअघि नै सामाजिक सञ्जालमार्फत् जानकारी गराएकी थिइन्।
थप उपचारका क्रममा उनलाई निमोनिया पनि देखिएको छ ।
‘स्वास प्रश्वासमा अलि कठिनाई भइरहेको र फोनमा बोल्दा सास फेर्न थप कष्ट हुने र अक्सिजनको मात्रासमेत कम भएको महसूस हुन्छ,’ उनले अस्पतालबाटै तीन दिन अघि लेखेको फेसबुक स्ट्याटसमा उल्लेख छ ।
पाँच दिनअघि उनलाई लक्षण सहितको संक्रमण पुष्टि भएको थियो। १० वर्षअघि उनलाई स्तन क्यान्सरसमेत भएको थियो ।