कनिका खबर
कार्तिक ८, काठमाडौं
छोटो अवधिमा धेरै प्रकारका खानेकुरा खाइरहने गर्दा उल्टै स्वास्थ्यमा नकारात्मक असर पर्नेभन्दै पोषणविद्ले सचेत गराएका छन् । छोटो अवधिमा धेरै प्रकारका खाना खाँदा रोग प्रतिरोधात्मक क्षमतामा कमी आउने पोषणविद् डा. मनसा थापा ठकुराठीले बताउनुभयो । कोभिड संक्रमणको जोखिम बढ्दै गएको अवस्थामा चिल्लो कम खान उहाँको सुझाब छ । दसैँका वेला मांसाहारी भोजनसँगै चिल्लो र धेरै परिकार खाने चलन छ । खासगरी दसैँमा माछामासु, गुलियो पेय पदार्थ, मिठाइजन्य वस्तुहरूको उपभोग बढी गरिने प्रचलन रहेकाले त्यसलाई कम गर्न पनि उहाँले आग्रह गर्नुभयो । कोभिड– १९ संक्रमणसँग लड्न पनि खानेकुरामा विशेष ख्याल गर्नुपर्ने उहाँको भनाइ छ । खानपानको चाडको रूपमा रहेको दसैँका वेला यसमा बढी ध्यान दिनुपर्ने हुन्छ । मासु र दही शरीरका लागि आवश्यक खाद्य वस्तु भएकाले पनि ठीक मात्रामा खान आग्रह गर्दै डा ठकुराठीले गुलियो पेय पदार्थ र मिठाइजन्य वस्तु नखानु नै उचित हुने धारणा राख्नुभयो ।
