मंसिर ८, दाङ ।
विश्वभर हालसम्म कोरोना भाइरसका कारण १३ लाख ९५ हजार मानिसको मृत्यु भएको छ । विश्वभरि कोरोनाका कारण ५ करोड ९० लाख मानिस सङ्क्रमित भएका छन् । सङ्क्रमित भएका मध्ये ४ करोड ८३ लाख ८ हजार मानिस भने उपचार पछि निको भएका छन् । सबैभन्दा धेरै अमेरिकामा २ लाख ६२ हजारको मृत्यु भएको छ । यस्तै भारतमा १ लाख ३३ हजारको मृत्इु भएको छ भने ब्राजिलमा १ लाख ६९ हजार मानिसको मृत्यु भएको छ ।
यसैबीच,बेलायतको अक्सफोर्ड युनिभर्सिटीले एक्स्ट्राजेनेकासँग मिलेर बनाइरहेको कोरोना भाइरसविरुद्धको खोप सङ्ंक्रमण रोक्न ७० प्रतिशत प्रभावकारी भएको दाबी गरिएको छ । युनिभर्सिटीका अनुसार अन्तिम चरणको मानव परीक्षणमा यो खोप कोभिड–१९ विरुद्ध ७० प्रतिशत प्रभावकारी पाइएको हो ।
यसअघि अमेरिकी कम्पनीहरु फाइजर र मोडेर्नाले बनाइरहेको खोप भने सङ्क्रमण नियन्त्रण गर्न ९५ प्रतिशत प्रभावकारी रहेको दाबी गरिएको थियो । अक्सफोर्डले बनाएको खोप भने अरु दुई खोपको तुलनामा निकै सस्तो र भण्डारण गर्न सजिलो हुने पनि बताइएको छ । यो खोपको लागि बेलायत सरकारले यसअघि नै १० करोड डोज प्रि–अर्डर गरिसकेको छ । जसबाट पाँच करोड मानिसलाई खोप दिन सकिने बताइएको छ ।
