कनिका संवाददाता
जेठ २२, दाङ ।
७३ औँ दिनदेखि जारी लकडाउनको मोडालिटी परिवर्तन लगायतका विषयमा छलफल गर्न आज मन्त्रिपरिषद् बैठक बस्दै छ । बैठक अपराह्न चार बजे बस्ने भएको छ ।
हिजो बुधबार स्वास्थ्यविद्, अर्थविद्, योजनाविद्लगायतले लकडाउनको मोडालिटीका बारेमा प्रधानमन्त्री प्रधानमन्त्री केपी शर्मा ओलीले चार घण्टा लामो छलफल गरेका थिए । छलफलमा विज्ञहरुले प्रधानमन्त्रीलाई लकडाउनको स्वरुप परिवर्तन गर्न सुझाव दिएका थिए । सरकारले लकडाउनको स्वरुपका बारेमा स्पष्ट नीति बाहिर नल्याएका कारण आजदेखि काठमाडौँ पसलहरु खुल्न थालेका छन् । सम्भवतः आज बस्ने बैठकले लकडाउनको मोडालिटीलाई केही खुकुलो बनाउने अनुमान गरिएको छ ।
कोरोना भाइरस संक्रमण रोकथाम तथा नियन्त्रण गर्ने उद्देश्यले सरकारले गत चैत ११ गतेदेखि देशभर लकडाउन घोषणा गरेको हो । सरकारले पछिल्लो पटक थपेको म्यादअनुसार आगामी जेठ ३२ गतेसम्म लकडाउन छ । लामो समयको लकडाउनले जीविकोपार्जनमा समस्या भएपछि र राजस्व पनि गुमेपछि सरकारलाई लकडाउन खुकुलो पार्नुपर्ने दबाब छ ।
