भदौ ८, काठमाडौँ ।
एमालेबाट निस्किएर नेकपा (एकीकृत समाजवादी) पार्टी गठनको घोषणा गरेको नेता माधवकुमार नेपाल समूहले पार्टीको घोषणा पत्र र अन्तरिम विधान तयार गरेको छ । नेता नेपालले तयार गर्नुभएको घोषणा पत्र र अन्तरिम विधानमा काठमाडौंको चन्द्रागिरीस्थित एक रिसोर्टमा छलफल भइरहेको छ ।
नेता मेटमणी चौधरीका अनुसार घोषणा पत्रमा नेकपा (एकीकृत समाजवादी) लाई नेपाली सर्वहारा श्रमजीवी वर्गको हित प्रतिनिधित्व गर्ने राजनीतिक संस्थाका रुपमा स्थापित गर्ने उल्लेख छ । बैठकमा नेता नेपालसहित ४६ जना सदस्य छन् ।
हिजो एक्कासी निर्णय भएकाले अरु सदस्य जाने क्रम आज पनि चल्ने चौधरीले जानकारी दिनुभयो । आज अरु सदस्य पुगेपछि थप छलफल गरेर भोलि सबैजना एकैपल्ट निर्वाचन आयोगमा जाने तयारी भएको उहाँले बताउनुभयो ।
निर्वाचन आयोगले नेपाल नेतृत्वको पार्टीलाई सनाखतका लागि भोलि आयोगमा बोलाएको छ । बिहान साढे ११ देखि दिउँसो २ बजेभित्र सनाखतका लागि केन्द्रीय कमिटी सदस्य र सांसदको सनाखत हुनेछ । त्यसका लागि सबै नेता एकै ठाउँमा बसेर भोलि आयोगमा जाने भएका हुन् ।
सरकारले दल विभाजनसम्बन्धी अध्यादेश ल्याएपछि गत बुधबार नेकपा एमालेबाट अलग भएको नेपाल समूहले नेकपा (एकीकृत समाजवादी) पार्टी दर्ताका लागि निर्वाचन आयोगमा निवदेन दर्ता गराएको हो ।
